యూపీఐ లావాదేవీలపై కేంద్రం కీలక ప్రకటన..! చార్జీల వదంతులకు చెక్..!

•  చార్జీల వదంతులకు చెక్.
• రూ.2,000 లోపు వ్యాపార చెల్లింపులకు ఎండీఆర్ మినహాయింపు.
•  సామాన్యులకు పూర్తి ఉచితం.. చిన్న వ్యాపారులకు శూన్య ఎండీఆర్ భరోసా.

ఢిల్లీ, మహా.
డిజిటల్ చెల్లింపుల వేదిక ‘యూపీఐ’ చార్జీలపై దేశవ్యాప్తంగా జరుగుతున్న ప్రచారానికి కేంద్ర ఆర్థిక శాఖ మరోసారి పూర్తి స్పష్టత ఇచ్చింది. సామాన్యులు, చిన్న వ్యాపారులపై ఎలాంటి అదనపు భారం పడబోదని కేంద్రం భరోసా కల్పించింది. యూపీఐ ద్వారా ఒక వ్యక్తి నుంచి మరో వ్యక్తికి (పీ2పీ) జరిగే లావాదేవీలన్నీ, బదిలీ చేసే మొత్తం ఎంతైనా సరే పూర్తిగా ఉచితంగానే కొనసాగుతాయని తేల్చిచెప్పింది. వినియోగదారులు వ్యాపారులకు (పీ2ఎం) చేసే చెల్లింపుల్లో రూ.2,000 వరకు ఎలాంటి మర్చంట్ డిస్కౌంట్ రేట్ (ఎండీఆర్) వసూలు చేయబోరని కేంద్రం స్పష్టం చేసింది. ఈ చెల్లింపుల ప్రక్రియలో వినియోగదారుడి జేబు నుంచి ఎలాంటి అదనపు రుసుము వసూలు చేయబోరని ప్రభుత్వం పునరుద్ఘాటించింది.
చిన్న వ్యాపారులకు ఊరట.. 96 శాతం చెల్లింపులు సేఫ్
చిన్న దుకాణదారులు, వీధి వ్యాపారులకు ఈ కొత్త విధానంలో ప్రత్యేక రక్షణ కల్పించారు. నెలకు రూ.లక్ష వరకు యూపీఐ ద్వారా చెల్లింపులు స్వీకరించే చిన్న వ్యాపారులకు ‘శూన్య ఎండీఆర్’ విధానం యథాతథంగా కొనసాగుతుందని ప్రభుత్వం తెలిపింది. ఈ తాజా నిర్ణయాలతో, మొత్తం యూపీఐ వాణిజ్య లావాదేవీల్లో సుమారు 96 శాతం లావాదేవీలపై కొత్త విధానం ప్రభావం ఏమాత్రం ఉండదని ఆర్థిక శాఖ స్పష్టం చేసింది. కేవలం రూ.2,000 దాటిన నిర్దిష్ట పెద్ద వ్యాపారుల లావాదేవీలకు మాత్రమే ఎండీఆర్ వర్తించేలా నిబంధనలు రూపొందించారు.
అక్టోబర్ 15 నుంచి కొత్త రూల్స్.. ఎండీఆర్ పన్ను కాదు
కొత్త యూపీఐ చార్జీల విధానం 2026 అక్టోబర్ 15 నుంచి అమల్లోకి రానుంది. ఈ సందర్భంగా మర్చంట్ డిస్కౌంట్ రేట్ (ఎండీఆర్) అనేది ప్రభుత్వం లేదా భారత జాతీయ చెల్లింపుల సంస్థ (ఎన్‌పీసీఐ) వసూలు చేసే పన్ను కాదని కేంద్రం వివరణ ఇచ్చింది. యూపీఐ వ్యవస్థ సాంకేతిక నిర్వహణ, భద్రత, భవిష్యత్ విస్తరణ కోసం పాలుపంచుకునే బ్యాంకులు, చెల్లింపుల యాప్‌ల మధ్య మాత్రమే ఈ రుసుము పంపిణీ అవుతుందని తెలిపింది. యూపీఐ లావాదేవీలపై 18 శాతం జీఎస్టీ విధిస్తున్నారన్న వదంతులను సైతం ప్రభుత్వం కొట్టిపారేసింది. చార్జీకి సంబంధించిన పన్నును ఎండీఆర్‌తో మాత్రమే అనుసంధానించారని, లావాదేవీ మొత్తంపై జీఎస్టీ ఉండదని స్పష్టం చేసింది.
యూపీఐ వ్యవస్థను మరింత కాలం పాటు సురక్షితంగా, సాంకేతికంగా అత్యున్నత ప్రమాణాలతో నడిపించేందుకు అవసరమైన ఆర్థిక స్థిరత్వాన్ని కల్పించడమే తమ ప్రధాన ఉద్దేశమని కేంద్రం పేర్కొంది. కొత్త నిబంధనల వల్ల వినియోగదారులు డబ్బులు పంపిన ప్రతిసారీ అదనపు రుసుము చెల్లించాలన్నది కేవలం అపోహ మాత్రమేనని, డిజిటల్ లావాదేవీలు మునుపటి లాగే సాఫీగా, ఉచితంగా సాగుతాయని ప్రభుత్వం స్పష్టం చేసింది.