సుప్రీంకోర్టును ఆశ్రయించిన దానం నాగేందర్.
• అనర్హత వేటుపై హైకోర్టు తీర్పును సవాల్ చేస్తూ పిటిషన్.
• సెప్టెంబర్ 23న అత్యవసర విచారణకు అంగీకరించిన ధర్మాసనం.
న్యూఢిల్లీ,మహా.
పార్టీ ఫిరాయింపుల వ్యవహారంలో తెలంగాణ హైకోర్టు ఇచ్చిన తీర్పుతో ఎమ్మెల్యే పదవిని కోల్పోయిన ఖైరతాబాద్ మాజీ ఎమ్మెల్యే దానం నాగేందర్ సుప్రీంకోర్టును ఆశ్రయించారు. తనను శాసనసభ సభ్యుడిగా అనర్హుడిగా ప్రకటిస్తూ హైకోర్టు వెలువరించిన ఉత్తర్వులను సవాల్ చేస్తూ ఆయన సర్వోన్నత న్యాయస్థానంలో ప్రత్యేక అనుమతి పిటిషన్ (ఎస్ఎల్పీ) దాఖలు చేశారు. సీనియర్ న్యాయవాది ముకుల్ రోహత్గీ సోమవారం ఈ అంశాన్ని సుప్రీంకోర్టు ప్రధాన న్యాయమూర్తి నేతృత్వంలోని ధర్మాసనం ఎదుట అత్యవసరంగా ప్రస్తావించారు. ఖైరతాబాద్ అసెంబ్లీ స్థానం ఖాళీ అయినట్లు హైకోర్టు ప్రకటించడంతో ఉపఎన్నిక ప్రక్రియ ముందడుగు వేసే అవకాశముందని న్యాయవాది కోర్టు దృష్టికి తీసుకెళ్లారు. దీనిపై స్పందించిన ధర్మాసనం, పిటిషన్ను సెప్టెంబర్ 23న విచారించేందుకు అంగీకరించింది.
గత 2023 శాసనసభ ఎన్నికల్లో బీఆర్ఎస్ తరఫున ఖైరతాబాద్ నుంచి విజయం సాధించిన దానం నాగేందర్, అనంతరం కాంగ్రెస్ పార్టీలో చేరారు. ఆ తర్వాత 2024 లోక్సభ ఎన్నికల్లో కాంగ్రెస్ అభ్యర్థిగా సికింద్రాబాద్ నుంచి బరిలోకి దిగారు. ఒక పార్టీ ఎమ్మెల్యేగా కొనసాగుతూ మరో పార్టీ తరఫున లోక్సభ ఎన్నికల్లో పోటీ చేయడం పదో షెడ్యూల్ ప్రకారం పార్టీ ఫిరాయింపుల పరిధిలోకి వస్తుందని తెలంగాణ హైకోర్టు స్పష్టం చేసింది. ఆయన 2024 ఏప్రిల్ 23న సికింద్రాబాద్ లోక్సభ స్థానానికి నామినేషన్ దాఖలు చేసిన నాటి నుంచే బీఆర్ఎస్ సభ్యత్వాన్ని స్వచ్ఛందంగా వదులుకున్నట్లు పరిగణిస్తూ, నాటి నుంచే అనర్హత అమల్లోకి వస్తుందని తేల్చిచెప్పింది. స్పీకర్ గతంలో అనర్హత పిటిషన్లను తోసిపుచ్చిన నిర్ణయాన్ని కొట్టివేస్తూ, ఖైరతాబాద్ స్థానాన్ని ఖాళీగా ప్రకటిస్తూ అసెంబ్లీ కార్యాలయం, కేంద్ర ఎన్నికల సంఘానికి తీర్పు ప్రతులు పంపాలని ఆదేశించింది.
ఈ నేపథ్యంలో హైకోర్టు తీర్పుపై స్టే ఇవ్వాలని కోరుతూ దానం నాగేందర్ సుప్రీంకోర్టు మెట్లెక్కారు. బీఆర్ఎస్ పార్టీ ఇప్పటికీ తనను తమ శాసనసభ్యుడిగానే గుర్తిస్తోందని, అసెంబ్లీలో బీఆర్ఎస్ బలం 38 అని కేటీఆర్ స్వయంగా ప్రకటించిన విషయాన్ని ఆయన ప్రస్తావిస్తున్నారు. పార్టీ తనపై ఎలాంటి క్రమశిక్షణా చర్యలూ తీసుకోలేదని, లోక్సభ ఎన్నికల్లో పోటీ చేసినంత మాత్రాన శాసనసభ సభ్యత్వం రద్దు కాబోదని ఆయన వాదిస్తున్నారు.
మరోవైపు దానం సుప్రీంకోర్టును ఆశ్రయిస్తారన్న ముందస్తు సమాచారంతో బీఆర్ఎస్ ఎమ్మెల్యే పాడి కౌశిక్రెడ్డి, బీజేపీ శాసనసభాపక్ష నేత ఏలేటి మహేశ్వర్రెడ్డి అత్యున్నత న్యాయస్థానంలో ఇప్పటికే కేవియట్ పిటిషన్లు దాఖలు చేశారు. తమ వాదనలు వినకుండా దానం పిటిషన్పై ఎలాంటి మధ్యంతర ఉత్తర్వులూ లేదా స్టే ఇవ్వకూడదని వారు కోరారు. హైకోర్టు తీర్పుపై సుప్రీంకోర్టు ఇప్పటివరకు ఎలాంటి స్టే మంజూరు చేయలేదని, విచారణకు మాత్రమే గ్రీన్ సిగ్నల్ ఇచ్చిందని స్పష్టమవుతోంది. దీంతో ఖైరతాబాద్ ఉపఎన్నిక దిశగా పరిణామాలు సాగుతాయా లేక దానం నాగేందర్కు ఊరట లభిస్తుందా అన్న అంశంపై సెప్టెంబర్ 23న జరిగే విచారణ కీలకంగా మారింది.
