- నేడో రేపో తీరం దాటే అవకాశం.
- బరిలోకి దిగిన యంత్రాంగం.
- విజయనగరం, శ్రీకాకుళం జిల్లాల్లో విద్యాసంస్థలకు సెలవు.
- అల్లూరి ఏజెన్సీలో ప్రత్యేక నిఘా.. మత్స్యకారులకు తీవ్ర హెచ్చరికలు.
విజయవాడ, మహా.
బంగాళాఖాతంలో ఏర్పడిన వాయుగుండం ఉత్తరాంధ్ర, దక్షిణ ఒడిశా తీరాల వైపు వేగంగా దూసుకొస్తోంది. భారత వాతావరణ శాఖ (ఐఎండీ) తాజా అంచనాల ప్రకారం.. పశ్చిమ మధ్య, ఆనుకుని ఉన్న వాయవ్య బంగాళాఖాతంలో కేంద్రీకృతమైన ఈ వాయుగుండం మరింత బలపడి తీవ్ర వాయుగుండంగా మారే అవకాశం ఉంది. ఇది పశ్చిమ వాయవ్య దిశగా పయనిస్తూ సెప్టెంబర్ 23వ తేదీ రాత్రి నుంచి 24వ తేదీ తెల్లవారుజామున విశాఖపట్నం – గోపాల్పూర్ (ఒడిశా) మధ్య తీరం దాటనుందని ఐఎండీ స్పష్టం చేసింది. దీని ప్రభావంతో రాబోయే 48 గంటల పాటు ఉత్తరాంధ్ర అంతటా భారీ నుంచి అతి భారీ వర్షాలు కురవడంతో పాటు, గంటకు 20 నుంచి 30 నాట్ల వేగంతో బలమైన ఈదురుగాలులు వీచే ప్రమాదం ఉందని వాతావరణ శాఖ హెచ్చరించింది.
సముద్రం తీవ్ర అల్లకల్లోలంగా మారనున్న నేపథ్యంలో మత్స్యకారులు ఎవరూ వేటకు వెళ్లొద్దని అధికారులు కచ్చితమైన ఆదేశాలు జారీ చేశారు. విశాఖపట్నం, భీమునిపట్నం, గంగవరం, కాకినాడ, కళింగపట్నం పోర్టుల్లో స్థానిక ప్రమాద హెచ్చరికలు కొనసాగుతున్నాయి. వాయుగుండం ముప్పు పొంచి ఉన్న నేపథ్యంలో రాష్ట్ర ప్రభుత్వం అప్రమత్తమైంది. వర్షాల తీవ్రత, విద్యార్థుల భద్రత దృష్ట్యా విజయనగరం, శ్రీకాకుళం జిల్లాల్లో సెప్టెంబర్ 23న పాఠశాలలకు సెలవు ప్రకటిస్తూ ఆయా జిల్లాల కలెక్టర్లు నిర్ణయం తీసుకున్నారు. మరోవైపు అల్లూరి సీతారామరాజు జిల్లా ఏజెన్సీ ప్రాంతాల్లోనూ అధికార యంత్రాంగం ప్రత్యేక నిఘా ఏర్పాటు చేసింది. భారీ వర్షాలకు ఘాట్ రోడ్లలో కొండచరియలు విరిగిపడే ప్రమాదం ఉండటంతో కొండవాలు ప్రాంతాల ప్రజలను అప్రమత్తం చేశారు. ప్రతికూల వాతావరణ పరిస్థితుల వల్ల విశాఖపట్నం – కొత్తవలస – కిరండోల్ మార్గంలో నడిచే పలు రైళ్ల రాకపోకలకు అంతరాయం కలిగే అవకాశం ఉన్నందున, ప్రయాణికులు ముందస్తుగా రైల్వే శాఖ అధికారిక సమాచారాన్ని సరిచూసుకోవాలని సూచించారు.
అలాగే, అన్నదాతలకు సైతం వ్యవసాయ, ఉద్యానవన శాఖలు ముందస్తు హెచ్చరికలు జారీ చేశాయి. బలమైన గాలుల కారణంగా అరటి, బొప్పాయి తదితర ఉద్యాన పంటలు, పండ్ల తోటలు, ఎత్తైన మొక్కలకు నష్టం వాటిల్లే ప్రమాదం ఉన్నందున తగిన జాగ్రత్తలు తీసుకోవాలని సూచించాయి. పొరుగున ఉన్న ఒడిశా రాష్ట్రంపైనా ఈ వాయుగుండం తీవ్ర ప్రభావం చూపనుంది. సెప్టెంబర్ 22న చాలా భారీ వర్షాలు, సెప్టెంబర్ 23, 24 తేదీల్లో అక్కడ అత్యంత భారీ వర్షాలు కురుస్తాయని ఐఎండీ అంచనా వేసింది.
వాయుగుండం తీరం దాటే సమయానికి ముందున్న 24 నుంచి 48 గంటలు ఉత్తరాంధ్రకు అత్యంత కీలకం కానున్నాయి. ఈ విపత్కర సమయంలో ప్రజలు చెట్లు, భారీ హోర్డింగులు, పాత భవనాలకు దూరంగా ఉండాలని, వాగులు, వంకలు పొంగిపొర్లుతున్నప్పుడు వాటిని దాటే సాహసం చేయవద్దని విపత్తుల నిర్వహణ సంస్థ హెచ్చరించింది. సామాజిక మాధ్యమాల్లో వచ్చే వదంతులను నమ్మవద్దని, కేవలం ఐఎండీ, ప్రభుత్వ అధికారులు ఇచ్చే అధికారిక సమాచారాన్ని మాత్రమే ప్రామాణికంగా తీసుకోవాలని అధికారులు విజ్ఞప్తి చేశారు.
