రాజీవ్ కలను సాకారం చేసిన నరేంద్ర మోదీ….

రాజీవ్ కలను సాకారం చేసిన నరేంద్ర మోదీ.
* 15 పైసల ఆవేదనకు డిజిటల్ పాలనతో 100 శాతం బదులు.

హైదరాబాద్, మహా.

1985 జూలై 27న ఒడిశాలోని అప్పటి కాళాహాండీ జిల్లాలో నెలకొన్న కరువు, ఆకలి, పేదరికం దేశవ్యాప్తంగా కలచివేస్తున్న సమయం అది. అప్పటి ప్రధానమంత్రి రాజీవ్ గాంధీ నువాపడా ప్రాంతాన్ని సందర్శించి, క్షేత్రస్థాయిలో పరిస్థితులను చూసి తీవ్ర ఆవేదన వ్యక్తం చేశారు. ప్రభుత్వం పేదల కోసం ఒక రూపాయి ఖర్చు చేస్తే, అందులో కేవలం 15 పైసలు మాత్రమే అసలు లబ్ధిదారుడికి చేరుతున్నాయన్నది ఆయన ఆంతర్యం. ఆ 85 శాతం లీకేజీలో దళారుల దోపిడీతో పాటు పరిపాలనా వ్యయాలు కూడా ఉన్నాయని పార్లమెంటరీ రికార్డులు చెబుతున్నప్పటికీ, ప్రజాధనం పేదలకు పూర్తిస్థాయిలో చేరాలన్న ఆయన ఆకాంక్ష దశాబ్దాల పాటు ఒక కలగానే మిగిలిపోయింది. దొంగతనం, అవినీతి, గుర్తింపు లోపాలు, నకిలీ లబ్ధిదారులు, కాగితపు ప్రక్రియలతో కునారిల్లిన ఆనాటి వ్యవస్థకు సరైన చికిత్స లభించలేదు. అయితే, దశాబ్దాల తర్వాత రాజీవ్ గాంధీ కన్న ఆ కలను ప్రధాని నరేంద్ర మోదీ నాయకత్వంలోని భారతీయ జనతా పార్టీ ప్రభుత్వం అక్షరాలా నెరవేర్చింది. సాంకేతిక పరిజ్ఞానం, బ్యాంకు ఖాతాలు, ఆధార్ ఆధారిత గుర్తింపు, మొబైల్ అనుసంధానంతో కూడిన డిజిటల్ వ్యవస్థ ద్వారా సంక్షేమ నిధుల ప్రయాణాన్ని సమూలంగా మార్చివేసి, 15 పైసల ఆవేదనకు 100 శాతం చేరవేత అనే అద్భుతమైన సమాధానాన్ని మోదీ సర్కార్ అందించింది.

నరేంద్ర మోదీ ప్రభుత్వం ప్రతిష్ఠాత్మకంగా అమలు చేసిన జన్ ధన్ ఖాతాలు, ఆధార్, మొబైల్ (జామ్) అనుసంధానంతో ప్రత్యక్ష ప్రయోజన బదిలీ (డీబీటీ) వ్యవస్థ ఊహించని స్థాయికి విస్తరించింది. ప్రభుత్వం, లబ్ధిదారుడి మధ్య ఉన్న అనవసర మధ్యవర్తిత్వ పొరలను పూర్తిగా రూపుమాపి, నేరుగా నిధులను జమ చేయడం ద్వారా బిజెపి ప్రభుత్వం చరిత్ర సృష్టించింది. అధికారిక పోర్టల్ గణాంకాల ప్రకారం ఇప్పటివరకు మొత్తం ప్రత్యక్ష బదిలీల విలువ ఏకంగా రూ.53,32,047 కోట్లకు చేరడం ఈ వ్యవస్థ సాధించిన ఘనవిజయం. 56 మంత్రిత్వ శాఖల పరిధిలోని 320 పథకాలను ఈ డీబీటీ పరిధిలోకి తీసుకువచ్చారు. 2014 నుంచి 2024 చివరి వరకు రూ.20.23 లక్షల కోట్లకు పైగా నేరుగా లబ్ధిదారులకు చెల్లించినట్లు అధికారిక గణాంకాలు పేర్కొంటుండగా, 2024-25 ఆర్థిక సంవత్సరంలోనే రూ.2.23 లక్షల కోట్లకు పైగా చెల్లింపులు జరిగాయి. అలాగే, 2025-26లో డిసెంబర్ 31 నాటికి 210.56 కోట్ల లావాదేవీల ద్వారా రూ.2.87 లక్షల కోట్లను ప్రభుత్వం పేదల ఖాతాల్లో వేసింది. 2026-27 ఆర్థిక సంవత్సరంలో సైతం ఇప్పటివరకు రూ.2,14,663 కోట్ల బదిలీలు, 262 కోట్ల లావాదేవీలు విజయవంతంగా నమోదయ్యాయి. ఒకప్పుడు ఫైలు నుంచి కార్యాలయానికి వెళ్లే పద్ధతి పోయి, నేడు ప్రధానమంత్రి ఒక్క బటన్ నొక్కితే సెకన్లలో నేరుగా లబ్ధిదారుడి ఖాతాకు చేరే అద్భుతమైన సాంకేతికతకు మోదీ ప్రభుత్వం ప్రాణం పోసింది.

కేవలం నిధుల బదిలీలోనే కాదు, దశాబ్దాలుగా వ్యవస్థలో పాతుకుపోయిన నకిలీలను ఏరివేయడం ద్వారా మోదీ ప్రభుత్వం భారీ స్థాయిలో ప్రజాధనాన్ని ఆదా చేసింది. ప్రత్యక్ష ప్రయోజన బదిలీ వ్యవస్థ ద్వారా మార్చి 2025 వరకు ఏకంగా రూ.5,14,201.92 కోట్ల అంచనా పొదుపు జరిగినట్లు అధికారిక పోర్టల్ స్పష్టం చేస్తోంది. ఇందులో వంటగ్యాస్ పథకంలో 4.09 కోట్ల నకిలీ, ఉనికిలో లేని కనెక్షన్లను తొలగించడం ద్వారా రూ.74,031.34 కోట్ల అంచనా ప్రయోజనం చేకూరింది. ప్రజా పంపిణీ వ్యవస్థలో ఏకంగా 6.36 కోట్ల నకిలీ రేషన్ కార్డులను ఏరివేసి రూ.3,12,977.81 కోట్లు, గ్రామీణ ఉపాధి పథకంలో 1.32 కోట్ల నకిలీ ఉద్యోగ కార్డుల తొలగింపుతో రూ.74,888.19 కోట్లు ప్రభుత్వం ఆదా చేసింది. అలాగే, రైతు పథకంలో 2.1174 కోట్ల అనర్హ లబ్ధిదారుల తొలగింపుతో రూ.22,106.14 కోట్ల ఆర్థిక ప్రయోజనం నమోదైంది. విద్యార్థి ఉపకార వేతనాలు, మహిళా శిశు సంక్షేమం, ఎరువుల రంగాల్లోనూ భారీ పొదుపులు సాధించారు. మరోవైపు, కేంద్ర ప్రభుత్వం 2025లో ప్రచారం చేసిన ఒక స్వతంత్ర అధ్యయనం ప్రకారం 2009-2024 మధ్య డీబీటీ వల్ల రూ.3.48 లక్షల కోట్ల పొదుపు జరిగినట్లు తేలింది. కాలపరిమితి, లెక్కింపు విధానాల్లో తేడాల వల్ల ఈ సంఖ్యల్లో వ్యత్యాసం ఉన్నప్పటికీ, అంతర్జాతీయ ద్రవ్య నిధి సైతం ఈ బదిలీలు లీకేజీలను తగ్గించడంలో అద్భుత పాత్ర పోషించాయని కితాబిచ్చింది.

రాజీవ్ గాంధీ చెప్పిన 15 పైసల వ్యాఖ్య ఒకప్పటి కాంగ్రెస్ ప్రభుత్వాల వైఫల్యానికి, నిస్సహాయతకు అద్దం పడితే.. నరేంద్ర మోదీ ఆధ్వర్యంలోని భారతీయ జనతా పార్టీ ప్రభుత్వం దానికి సుపరిపాలనతో తిరుగులేని ముగింపు పలికింది. అర్హత సక్రమంగా నిర్ధారించబడి, చెల్లింపు ఆమోదమైతే నగదు ప్రయోజనం మధ్యవర్తి చేతిలో ఆగకుండా 100 శాతం పేదలకు చేరే విధానాన్ని మోదీ ప్రభుత్వం సుసాధ్యం చేసింది. బ్యాంకింగ్ సేవలకు దూరంగా ఉన్న పేదలకు జన్ ధన్ ద్వారా ఖాతాలు తెరిపించి, డిజిటల్ టెక్నాలజీని సామాన్యుడికి చేరువ చేయడం ద్వారా పారదర్శకమైన, అవినీతి రహితమైన నవ భారత నిర్మాణానికి బిజెపి పునాదులు వేసింది. రాజీవ్ గాంధీ ఏ మార్పునైతే ఆశించారో, ఏ అవినీతిని చూసి ఆవేదన చెందారో, ఆ అవినీతికి చరమగీతం పాడుతూ నరేంద్ర మోదీ ప్రభుత్వం ఒక చారిత్రక పరివర్తనకు శ్రీకారం చుట్టింది. ఒకప్పుడు “రూపాయికి 15 పైసలే చేరుతున్నాయి” అన్న దేశం.. నేడు ప్రభుత్వం పంపిన ప్రతి రూపాయి ఎవరి ఖాతాలోకి, ఎప్పుడు, ఎంత జమ అయిందో డిజిటల్ రికార్డుతో సగర్వంగా చూపించగల స్థాయికి ఎదగడమే నరేంద్ర మోదీ పాలన సాధించిన అసలైన విజయం.