చిన్నారులకు డిజిటల్ రక్షణ కవచం.
* ఆన్‌లైన్ నేరాల కట్టడికి ప్రత్యేక చర్యలు.
* న్యాయ సేవా సంస్థల కృషికి రాష్ట్ర ప్రభుత్వ పూర్తి మద్దతు.
* దక్షిణాది ప్రాంతీయ సదస్సులో ముఖ్యమంత్రి రేవంత్ రెడ్డి ఉద్ఘాటన.
హైదరాబాద్, మహా.
ఆన్‌లైన్ వేధింపులు, సైబర్ నేరాల బారిన పడకుండా పిల్లలకు అవసరమైన భద్రత, సంరక్షణ కల్పించేందుకు తెలంగాణ ప్రభుత్వం అత్యున్నత ప్రాధాన్యత ఇస్తోందని రాష్ట్ర ముఖ్యమంత్రి ఎ. రేవంత్ రెడ్డి స్పష్టం చేశారు. జాతీయ న్యాయ సేవా ప్రాధికార సంస్థ (నల్సా) ఆధ్వర్యంలో ‘డిజిటల్ వేదికలపై పిల్లలకు రక్షణ, సులభంగా న్యాయం అందించడం – ఆన్‌లైన్ లైంగిక వేధింపులను అరికట్టడం’ అనే ప్రధాన ఇతివృత్తంతో హైదరాబాద్‌లో దక్షిణాది ప్రాంతీయ సదస్సు ఘనంగా ప్రారంభమైంది. ఈ ప్రతిష్టాత్మక సదస్సుకు హాజరైన ముఖ్యమంత్రి మాట్లాడుతూ.. డిజిటల్ వేదికలపై పిల్లల రక్షణ కోసం వ్యవస్థలను బలోపేతం చేయడానికి న్యాయసేవల సంస్థలు చేస్తున్న కృషిని కొనియాడారు. ఈ మంచి కార్యక్రమాలను ప్రతి గ్రామానికి చేరవేసేందుకు రాష్ట్ర ప్రభుత్వం సంపూర్ణంగా సహకరిస్తుందని హామీ ఇచ్చారు. ప్రస్తుత తరుణంలో సైబర్ భద్రతను ఇతివృత్తంగా ఎంచుకుని సదస్సు నిర్వహించిన నల్సాకు, సుప్రీంకోర్టు న్యాయమూర్తి జస్టిస్ విక్రమ్ నాథ్‌కు ఆయన ప్రత్యేక ధన్యవాదాలు తెలిపారు.
మహిళలు, చిన్నారుల రక్షణ కోసం రాష్ట్రంలో పోలీసు శాఖ ఆధ్వర్యంలో భరోసా కేంద్రాలు, చైల్డ్ ప్రొటెక్షన్ యూనిట్లు, చైల్డ్ వెల్ఫేర్ కమిటీలు, ప్రత్యేక కోర్టులు సమర్థవంతంగా పనిచేస్తున్నాయని ముఖ్యమంత్రి వివరించారు. బాధితులకు ఒకేచోట పోలీసు, వైద్య, న్యాయ సహాయంతో పాటు కౌన్సెలింగ్ అందించేలా భరోసా కేంద్రాలను తీర్చిదిద్దామన్నారు. దేశంలోనే మొట్టమొదటి ‘చైల్డ్ ఫ్రెండ్లీ కోర్టు’ను సైతం హైదరాబాద్‌లోనే ఏర్పాటు చేశామని గుర్తుచేశారు. పిల్లల రక్షణ కోసం విమెన్ సేఫ్టీ వింగ్ ఆధ్వర్యంలో షీ-భరోసా సైబర్ ల్యాబ్‌లు పనిచేస్తున్నాయని, సైబ్-హెర్ యాప్ ద్వారా విద్యార్థులు, ఉపాధ్యాయులకు ఆన్‌లైన్ భద్రతపై అవగాహన కల్పిస్తున్నామని తెలిపారు. విద్యార్థులనే సైబర్ అంబాసిడర్లుగా తయారు చేసి తోటివారికి సైబర్ భద్రతపై అవగాహన కల్పించే వినూత్న కార్యక్రమం చేపట్టామన్నారు. అన్ని ప్రభుత్వ శాఖలు సమన్వయంతో పనిచేసినప్పుడే పిల్లల రక్షణ సాధ్యమవుతుందన్నారు. రాష్ట్ర న్యాయ సేవా ప్రాధికార సంస్థ (టీజీఎస్-ఎల్ఎస్ఏ) ఇప్పటికే పాఠశాల విద్యాశాఖతో ఒప్పందం కుదుర్చుకుని, విద్యార్థులకు చట్టపరమైన హక్కులపై అవగాహన కల్పిస్తోందని, ఇప్పటివరకు మూడు వేల మందికి పైగా చైల్డ్ ప్రొటెక్షన్ అధికారులకు శిక్షణ ఇచ్చామని సీఎం వెల్లడించారు.
సైబర్ నేరాల నియంత్రణలో తల్లిదండ్రుల పాత్ర ఎంతో కీలకమని రేవంత్ రెడ్డి ఉద్ఘాటించారు. పిల్లలు పొరపాటున సైబర్ నేరాల వలలో పడినప్పుడు వారిని తప్పుబట్టకుండా, ఆసక్తితో, అవగాహనతో అండగా నిలవాలని సూచించారు. ఆన్‌లైన్ మోసాలకు గురైనప్పుడు ప్రతి ఒక్కరూ సైబర్ క్రైమ్ టోల్ ఫ్రీ నంబర్ 1930ను, అలాగే పిల్లల సహాయం కోసం 1098 చైల్డ్ హెల్ప్‌లైన్‌ నంబర్‌ను విధిగా గుర్తుంచుకోవాలని ఆయన విజ్ఞప్తి చేశారు. బాధితులకు ఆర్థిక సహాయం అందించడం నుంచి ప్రభుత్వ పాఠశాలల్లో ప్రవేశం కల్పించడం వరకు ప్రభుత్వం అన్ని చర్యలు తీసుకుంటున్నదని చెప్పారు. నేరస్తుడికి శిక్ష పడటమే కాదు, బాధితుడి జీవితాన్ని తిరిగి నిలబెట్టి, వారు కోల్పోయిన బాల్యాన్ని, గౌరవాన్ని తిరిగి అందించడమే నిజమైన న్యాయమని ముఖ్యమంత్రి అభివర్ణించారు. ఈ సదస్సులో జరిగే చర్చలు, సిఫారసులు యావత్ దేశానికి మార్గదర్శకంగా నిలుస్తాయని ఆయన ఆకాంక్షించారు. అనంతరం ఉచిత న్యాయ సేవల నిమిత్తం సిద్ధం చేసిన సంచార లోక్ అదాలత్ (మొబైల్ లోక్ అదాలత్) వాహనాలను కేంద్ర మంత్రులు, న్యాయమూర్తుల సమక్షంలో సీఎం జెండా ఊపి లాంఛనంగా ప్రారంభించారు.
ఈ అత్యున్నత స్థాయి సదస్సులో కేంద్ర మంత్రి అర్జున్ రామ్ మేఘావాల్, నల్సా ఎగ్జిక్యూటివ్ ఛైర్మన్, సుప్రీంకోర్టు న్యాయమూర్తి జస్టిస్ విక్రమ్ నాథ్, సుప్రీంకోర్టు న్యాయమూర్తులు జస్టిస్ పీఎస్ నరసింహ, జస్టిస్ ఆర్. మహదేవన్, జస్టిస్ అలోక్ అరాధే, తెలంగాణ హైకోర్టు ప్రధాన న్యాయమూర్తి జస్టిస్ అపరేష్ కుమార్ సింగ్ పాల్గొన్నారు. వీరితో పాటు ఆంధ్రప్రదేశ్, కర్ణాటక, కేరళ, ఒడిశా, సిక్కిం, తమిళనాడు, త్రిపుర హైకోర్టుల ప్రధాన న్యాయమూర్తులు, తెలంగాణ రాష్ట్ర న్యాయ సేవాధికార సంస్థ ఎగ్జిక్యూటివ్ ఛైర్మన్ జస్టిస్ శ్యామ్ కోషి, పలు రాష్ట్రాల హైకోర్టు న్యాయమూర్తులు, ఉన్నతాధికారులు విశేష సంఖ్యలో హాజరయ్యారు.
