కర్ణాటక అసెంబ్లీలో ‘వందేమాతరం’ రగడ…

కర్ణాటక అసెంబ్లీలో ‘వందేమాతరం’ రగడ.
* రెండు చరణాలకే ఆపడంపై బీజేపీ ఆగ్రహం.
హైదరాబాద్, మహా.
కర్ణాటక శాసనసభ ప్రత్యేక సమావేశాల తొలిరోజే తీవ్ర గందరగోళం నెలకొంది. సోమవారం సభ ప్రారంభం సందర్భంగా అధికారికంగా వందేమాతరం గీతాన్ని ఆలపించగా, కేవలం రెండు చరణాల తర్వాతే దానిని నిలిపివేయడం అధికార కాంగ్రెస్, ప్రతిపక్ష బీజేపీ మధ్య వాగ్వాదానికి దారితీసింది. గీతం మధ్యలో ఆగిపోవడంతో తీవ్ర అభ్యంతరం వ్యక్తం చేసిన బీజేపీ సభ్యులు.. మిగిలిన చరణాలను స్వయంగా ఆలపిస్తూ నిరసన వ్యక్తం చేశారు. ప్రభుత్వానికి వ్యతిరేకంగా నినాదాలు చేశారు. శాసన మండలిలోనూ అచ్చం ఇదే తరహా పరిణామం చోటుచేసుకుంది. మండలి చైర్మన్ సలీం అహ్మద్ రాజ్యాంగ పీఠికను చదువుతున్న సమయంలో బీజేపీ సభ్యులు వందేమాతరం మిగిలిన చరణాలను ఆలపించి తమ అసంతృప్తిని ప్రదర్శించారు.
ఈ వివాదానికి రాష్ట్ర ప్రభుత్వం ఇటీవల తీసుకున్న నిర్ణయమే ప్రధాన కారణం. సెప్టెంబర్ 8న కర్ణాటక ప్రభుత్వం ఒక ఉత్తర్వు జారీ చేస్తూ.. రాష్ట్ర ప్రభుత్వ సాధారణ కార్యక్రమాల్లో వందేమాతరం మొదటి రెండు చరణాలను మాత్రమే ఆలపించాలని స్పష్టం చేసింది. అయితే రాష్ట్రపతి, ఉపరాష్ట్రపతి, ప్రధానమంత్రి లేదా గవర్నర్ పాల్గొనే ప్రత్యేక కార్యక్రమాల్లో మాత్రం మొత్తం ఆరు చరణాలను ఆలపించాలని ఆ ఆదేశాల్లో పేర్కొంది. ఈ నిర్ణయం అధికార పరిధిని ప్రశ్నించేలా ఉందంటూ న్యాయవాది గిరీష్ భారద్వాజ్ కర్ణాటక హైకోర్టులో ఇప్పటికే ప్రజాప్రయోజన వ్యాజ్యం (పిల్) దాఖలు చేశారు.
అంతేకాకుండా, రాష్ట్ర ప్రభుత్వ నిర్ణయం కేంద్ర హోం మంత్రిత్వ శాఖ జారీ చేసిన మార్గదర్శకాలకు భిన్నంగా ఉండటంతో ఈ వివాదం మరింత ముదిరింది. వందేమాతరం, జనగణమన రెండింటినీ ఒకే కార్యక్రమంలో ఆలపించే సందర్భంలో వందేమాతరం ఆరు చరణాల అధికారిక రూపాన్ని ఆలపించాలని కేంద్రం ఈ ఏడాది జనవరిలో సూచించింది. దీనికి విరుద్ధంగా రాష్ట్ర ప్రభుత్వం కేవలం రెండు చరణాల పరిమితిని విధించడం రాజకీయ దుమారానికి దారితీసింది.
రాష్ట్రంలో నెలకొన్న తీవ్ర కరువు పరిస్థితులు, రైతుల సమస్యలు, పశ్చిమ కనుమల పర్యావరణ పరిరక్షణకు సంబంధించిన కస్తూరిరంగన్ నివేదికపై విస్తృతంగా చర్చించేందుకే ప్రభుత్వం మూడు రోజుల పాటు ఈ ప్రత్యేక సమావేశాలను ఏర్పాటు చేసింది. ఇలాంటి కీలకమైన ప్రజా సమస్యలపై చర్చ ప్రారంభం కావాల్సిన రోజే, వందేమాతరం వ్యవహారం సభను కుదిపేసింది. ఈ గందరగోళం అనంతరం స్పీకర్ జీఎస్ పాటిల్ సభా కార్యక్రమాలను కొనసాగించారు. ఇటీవల కన్నుమూసిన మాజీ ఎమ్మెల్యే ఆర్‌బీ శిరియణ్ణవర్‌కు స్పీకర్‌తో పాటు ముఖ్యమంత్రి డీకే శివకుమార్ నివాళులర్పించారు. అనంతరం ప్రత్యేక సమావేశాల ప్రధాన అజెండాపై చర్చ మొదలైంది.