బీఆర్‌ఎస్‌ గ్రాఫ్‌ డౌన్‌….

బీఆర్‌ఎస్‌ గ్రాఫ్‌ డౌన్‌.
• మూడు రోజుల అసెంబ్లీ పై ఫ్లాష్‌ సర్వే.
• ధరణి భూముల చిట్టా సిద్ధం.
• 22ఏపై తప్పుడు ప్రచారాన్ని తిప్పికొడదాం.
• సీఎం రేవంత్‌రెడ్డి.

హైదరాబాద్‌, మహా .

మూడు రోజుల అసెంబ్లీ సమావేశాలతో తెలంగాణ రాజకీయ ముఖచిత్రం మారిపోయిందని ముఖ్యమంత్రి రేవంత్‌రెడ్డి స్పష్టం చేశారు. అసెంబ్లీలో అధికార కాంగ్రెస్‌ ఎమ్మెల్యేలు, మంత్రులు, విప్‌లు సమర్థంగా పనిచేశారని, సభలో జరిగిన పరిణామాలపై నిర్వహించిన ఫ్లాష్‌ సర్వేలో బీఆర్‌ఎస్‌ గ్రాఫ్‌ గణనీయంగా పడిపోయిందని సీఎల్పీ సమావేశంలో సీఎం వెల్లడించారు. ప్రతిపక్షం చేస్తున్న రాజకీయాన్ని ప్రజలు గమనిస్తున్నారని, కాంగ్రెస్‌ శాసనసభాపక్షం సమష్టిగా ముందుకు సాగాలని ఆయన దిశానిర్దేశం చేశారు.

మూడు రోజుల అసెంబ్లీ సమావేశాలను రాజకీయంగా కాంగ్రెస్‌కు అనుకూలంగా మలచడంలో మంత్రులు, విప్‌లు, ఎమ్మెల్యేలు కీలకంగా వ్యవహరించారని రేవంత్‌రెడ్డి ప్రశంసించారు. ప్రభుత్వంపై ప్రతిపక్షం చేస్తున్న విమర్శలకు సభలోనే సమర్థవంతమైన సమాధానాలు ఇవ్వడంతో పాటు, ప్రజా సమస్యలపై ప్రభుత్వం తీసుకుంటున్న నిర్ణయాలను ప్రజలకు వివరించడంలో ఎమ్మెల్యేల పనితీరు బాగుందని ఆయన పేర్కొన్నారు.

అసెంబ్లీ సమావేశాల్లో బీఆర్‌ఎస్‌ అనుసరించిన వైఖరిపై కూడా సీఎం తీవ్రంగా స్పందించారు. ప్రజా సమస్యలపై చర్చకు వేదికగా ఉండాల్సిన శాసనసభను రాజకీయ ఆందోళనలకు వేదికగా మార్చడం ద్వారా ప్రతిపక్షం తనకే నష్టం చేసుకుందని రేవంత్‌రెడ్డి స్పష్టం చేశారు. సభలో ప్రభుత్వాన్ని నిలదీయడం ప్రతిపక్షం బాధ్యతేనని, అయితే సభా కార్యక్రమాలను సజావుగా సాగనివ్వకుండా అడ్డుకోవడం ద్వారా ప్రజల ముందు ఎవరి వైఖరి ఎలా ఉందో స్పష్టమైందని ఆయన పేర్కొన్నారు.

ఇక 22ఏ భూముల అంశంపై ముఖ్యమంత్రి రేవంత్‌రెడ్డి అత్యంత ఘాటుగా స్పందించారు. 22ఏ పేరుతో ప్రతిపక్షం చేస్తున్న ప్రచారానికి వాస్తవాలతో సమాధానం ఇవ్వాలని ఆయన స్పష్టం చేశారు. భూముల అంశాన్ని రాజకీయ ప్రయోజనాల కోసం ఉపయోగించుకోవడాన్ని కాంగ్రెస్‌ ప్రభుత్వం సహించదని, అవసరమైన అన్ని వివరాలను ప్రజల ముందుంచేందుకు ప్రభుత్వం సిద్ధంగా ఉందని తేల్చిచెప్పారు.

ఈ క్రమంలో బీఆర్‌ఎస్‌ నేత హరీశ్‌రావును ఉద్దేశించి రేవంత్‌రెడ్డి చేసిన వ్యాఖ్యలు రాజకీయంగా ప్రకంపనలు సృష్టించాయి. “హరీశ్‌రావు.. ధరణిలో రాయించుకున్న భూముల చిట్టా బయటపెడదాం. బీఆర్‌ఎస్‌ నేతల చిట్టా అంతా సిద్ధంగా ఉంది” అంటూ సీఎం స్పష్టమైన హెచ్చరిక చేశారు. దీంతో 22ఏ భూముల అంశం ఒక్కసారిగా కాంగ్రెస్‌ వర్సెస్‌ బీఆర్‌ఎస్‌ మధ్య ప్రధాన రాజకీయ పోరుగా మారింది.

ధరణి రికార్డులు, భూముల లావాదేవీలు, 22ఏ జాబితా వంటి అంశాలు ఇకపై రాజకీయ ఆరోపణలకు మాత్రమే పరిమితం కాకుండా ప్రజల ముందుకు వచ్చే వాస్తవాల ఆధారంగా చర్చకు రావాల్సిన పరిస్థితి ఏర్పడింది. ప్రభుత్వం వద్ద ఉన్న భూముల వివరాలను బయటపెడతామని సీఎం ప్రకటించడంతో బీఆర్‌ఎస్‌ నేతల భూముల వ్యవహారం రాజకీయంగా కీలక అంశంగా మారింది.

అసెంబ్లీ సమావేశాల ప్రారంభం నుంచే కాంగ్రెస్‌, బీఆర్‌ఎస్‌ మధ్య తీవ్ర రాజకీయ పోరు కొనసాగింది. నిరసనలు, నినాదాలు, సభలో వాగ్వాదాలు, సభ్యుల సస్పెన్షన్‌ వంటి పరిణామాలు వరుసగా చోటుచేసుకున్నాయి. ప్రతిపక్షం ప్రభుత్వాన్ని ఇరుకున పెట్టేందుకు ప్రయత్నిస్తే, అధికార కాంగ్రెస్‌ అదే స్థాయిలో ప్రతిదాడి చేసింది. మూడు రోజుల వ్యవహారాన్ని సమగ్రంగా ప్రజల్లోకి తీసుకెళ్లే విషయంలో కాంగ్రెస్‌ శాసనసభాపక్షం అనుసరించిన వ్యూహం ఫలించిందని సీఎం అభిప్రాయపడ్డారు.

ఈ పరిణామాల మధ్య నిర్వహించిన ఫ్లాష్‌ సర్వేలో బీఆర్‌ఎస్‌ గ్రాఫ్‌ భారీగా పడిపోయిందని సీఎం రేవంత్‌రెడ్డి చెప్పడం రాజకీయంగా ప్రాధాన్యం సంతరించుకుంది. అసెంబ్లీలో జరిగిన ప్రతి పరిణామాన్ని ప్రజలు గమనిస్తున్నారని, ప్రతిపక్షం వ్యవహరించిన తీరుకు ప్రజల స్పందన సర్వేలో ప్రతిఫలించిందని సీఎం పేర్కొన్నారు.

కాంగ్రెస్‌ శాసనసభాపక్ష సమావేశంలో రేవంత్‌రెడ్డి చేసిన వ్యాఖ్యలు పార్టీ ఎమ్మెల్యేల్లోనూ కొత్త ఉత్సాహాన్ని నింపాయి. అసెంబ్లీ వేదికగా ప్రభుత్వ విధానాలను బలంగా వివరించడంతో పాటు, ప్రతిపక్షం లేవనెత్తే ప్రతి అంశానికి వాస్తవాలతో సమాధానం ఇవ్వాలని ఆయన స్పష్టం చేశారు. సభలో కాంగ్రెస్‌ బలం, ప్రభుత్వ పనితీరు ప్రజలకు స్పష్టంగా కనిపించేలా ఎమ్మెల్యేలంతా సమన్వయంతో పనిచేయాలని సూచించారు.