- ఓటుకు నోటు కేసు
- సీఎం రేవంత్ రెడ్డికి బిగ్ రిలీఫ్
- రూ.50 లక్షల అటాచ్మెంట్ ఆర్డర్ రద్దు
హైదరాబాద్, మహా : సీఎం రేవంత్ రెడ్డిపై ఉన్న 2015 నాటి ఓటుకు నోటు కేసులో కీలక పరిణామం చోటుచేసుకుంది. ఈ కేసులో ఎన్ఫోర్స్మెంట్ డైరెక్టరేట్ (ఈడీ) చేసిన రూ.50 లక్షల అటాచ్మెంట్ను ధ్రువీకరిస్తూ గతంలో ఇచ్చిన ఆదేశాన్ని అప్పిలేట్ ట్రైబ్యునల్ రద్దు చేసింది. ఈ వ్యవహారంలో రేవంత్ రెడ్డి తో పాటు మరో ముగ్గురికి కూడా ట్రైబ్యునల్ నుంచి భారీ ఊరట లభించింది. ఈ మేరకు ఢిల్లీలోని అప్పిలేట్ ట్రైబ్యునల్ ఈనెల 14వ తేదీన ఉత్తర్వులు జారీ చేసింది. జస్టిస్ మునీశ్వర్ నాథ్ భండారీ నేతృత్వంలోని ధర్మాసనం ఈ కేసును విచారించింది. రేవంత్ రెడ్డి, వేమ్ కృష్ణ కీర్తన్, రుద్ర శివకుమార్ ఉదయ్ సింహ, బిషప్ హ్యారీ సెబాస్టియన్లు.. 2022 ఫిబ్రవరి 8వ తేదీన అడ్జుడికేటింగ్ అథారిటీ ఇచ్చిన ఉత్తర్వులను సవాలు చేశారు. అంతకుముందు 2021 మే 25వ తేదీన ఈడీ రూ.50 లక్షలను ప్రొవిజనల్గా అటాచ్ చేసింది.
ఈ ఓటుకు నోటు కేసులో అసలు వివాదం రూ.50 లక్షల మొత్తానికి సంబంధించింది కాగా.. ఈ మొత్తాన్ని లంచంగా ఇవ్వబోయినట్లు ఆరోపణలు ఉన్న నగదుకు సమానమైన మొత్తాన్ని ఈడీ ఇప్పటికే అటాచ్ చేసింది. అయితే అప్పీలుదారుల తరఫున అసలు నగదును ఇప్పటికే అవినీతి నిరోధక శాఖ (ఏసీబీ) స్వాధీనం చేసుకుని.. ట్రయల్ కోర్టులో డిపాజిట్ చేసిందని వాదించారు. ప్రివెన్షన్ ఆఫ్ మనీ లాండరింగ్ యాక్ట్ (పీఎంఎల్ఏ)లోని సెక్షన్ 5(1)(బి)లోని నిబంధనలను ట్రైబ్యునల్ పరిశీలించింది. ఇప్పటికే రూ.50 లక్షలు కోర్టు ఆధీనంలో భద్రంగా ఉన్నప్పుడు.. ఆ మొత్తాన్ని నిందితులు తరలించడం, ఇతర విధంగా వినియోగించే అవకాశం లేదని ధర్మాసనం అభిప్రాయపడింది. ఈ పరిస్థితుల్లో అదే మొత్తానికి సమానమైన మరో రూ.50 లక్షలను అటాచ్ చేయాల్సిన పరిస్థితి లేదని ట్రైబ్యునల్ పేర్కొంది. దీంతో రూ.50 లక్షల అటాచ్మెంట్ను ధ్రువీకరిస్తూ అడ్జుడికేటింగ్ అథారిటీ ఇచ్చిన ఆదేశాన్ని కోర్టు రద్దు చేసింది.
2015లో తెలంగాణలో జరిగిన ఎమ్మెల్సీ ఎన్నికల సమయంలో ఈ ఓటుకు నోటు కేసు వ్యవహారం వెలుగులోకి వచ్చింది. జూన్ 1వ తేదీన జరగాల్సిన ఎమ్మెల్సీ ఎన్నికలకు ముందు ఓటు కోసం రూ.5 కోట్ల లంచం ఆఫర్ చేశారనే ఆరోపణలపై హైదరాబాద్ ఏసీబీ అధికారులు 2015 మే 31వ తేదీన ఎఫ్ఐఆర్ నమోదు చేశారు. ఆ సమయంలో రేవంత్ రెడ్డి టీడీపీ ఎమ్మెల్యేగా ఉండగా.. వేమ్ నరేందర్ రెడ్డి టీడీపీ అభ్యర్థిగా ఉన్నారు. ఎమ్మెల్యే ఎల్విస్ స్టీఫెన్సన్ను తమ అభ్యర్థికి అనుకూలంగా ఓటు వేయించేందుకు లేదా ఓటింగ్కు దూరంగా ఉండేలా చేయడానికి రూ.50 లక్షలను అడ్వాన్స్గా ఆఫర్ చేశారని ఏసీబీ ప్రధానంగా ఆరోపించింది.
సికింద్రాబాద్లోని సౌత్ లాలాగూడలో ఉన్న ఓ అపార్ట్మెంట్లో ఈ వ్యవహారం జరిగిందని ఏసీబీ పేర్కొంది. అక్కడే నిందితులను పట్టుకున్నామని.. రూ.50 లక్షల నగదును స్వాధీనం చేసుకున్నామని ఏసీబీ తెలిపింది. ఈ కేసులో ఆడియో, వీడియో రికార్డింగులను కూడా సేకరించినట్లు దర్యాప్తు సంస్థ పేర్కొంది. ఏసీబీ కేసు నమోదు చేసిన తర్వాత ఈడీ కూడా ఈ వ్యవహారంపై ఈసీఐఆర్ నమోదు చేసింది. ఆ తర్వాత అసలు స్వాధీనం చేసుకున్న రూ.50 లక్షలకు సమానమైన మొత్తాన్ని ఈడీ ప్రొవిజనల్గా అటాచ్ చేసింది.
తాజా ట్రైబ్యునల్ ఉత్తర్వులతో ఆ అటాచ్మెంట్ను ధ్రువీకరిస్తూ 2022లో ఇచ్చిన ఆదేశం రద్దు అయింది. అయితే ఇది 2015 ఓటుకు నోటు కేసులోని ఇతర దర్యాప్తు, న్యాయ ప్రక్రియలపై తుది తీర్పుగా భావించాల్సిన అవసరం లేదు. తాజా ఉత్తర్వులు ప్రధానంగా ఈడీ చేసిన రూ.50 లక్షల అటాచ్మెంట్కు సంబంధించినవి కావడం గమనార్హం. దీంతో 2015 నాటి ఓటుకు నోటు కేసులో రేవంత్ రెడ్డికి సంబంధించిన ఆస్తి అటాచ్మెంట్ అంశంలో తాజా పరిణామం చోటుచేసుకుంది. ఇప్పటికే ఏసీబీ స్వాధీనం చేసుకున్న నగదు కోర్టు ఆధీనంలో ఉన్న నేపథ్యంలో అదే మొత్తానికి సమానమైన నగదును ఈడీ అటాచ్ చేయడంపై ట్రైబ్యునల్ తన నిర్ణయం వెలువరించింది. అయితే అసలు కేసులోని ఆరోపణలు, దర్యాప్తు, ఇతర న్యాయపరమైన అంశాలు తమ పరిధిలో కొనసాగుతాయా లేదా అన్నది సంబంధిత కోర్టులు, దర్యాప్తు సంస్థల తదుపరి చర్యలపై ఆధారపడి ఉంటుంది.
