• చట్టబద్ధత లేని పథకాలకు ప్రజాధనం ఎలా ఖర్చు చేస్తారు?
• భూ బాధితుల సమస్యలపై రేపు నివేదిక ఇవ్వాలని ఆదేశం.
హైదరాబాద్, మహా.
తెలంగాణ ప్రభుత్వం అమలు చేస్తున్న కల్యాణలక్ష్మీ, షాదీ ముబారక్ పథకాలపై తెలంగాణ హైకోర్టులో బుధవారం కీలక చర్చ జరిగింది. ప్రజాధనాన్ని సంక్షేమ పథకాల కోసం వినియోగించే అంశంపై విచారణ సందర్భంగా ధర్మాసనం పలు కీలక వ్యాఖ్యలు చేసింది. చట్టబద్ధత లేని పథకాలకు ప్రజాధనాన్ని ఖర్చు చేయడం ఎలా సాధ్యమని ప్రశ్నించింది. ప్రభుత్వ రంగ సంస్థలను లాభాల్లోకి తీసుకొచ్చి, వాటి ద్వారా సమకూరే ఆదాయాన్ని సంక్షేమ పథకాలకు వినియోగించే అవకాశం ఉందని ధర్మాసనం అభిప్రాయపడింది.
ప్రభుత్వం అమలు చేస్తున్న సంక్షేమ పథకాలు, ప్రజాధనం వినియోగం, వాటికి సంబంధించిన చట్టపరమైన అంశాలపై విచారణ సందర్భంగా ఈ వ్యాఖ్యలు వచ్చాయి. ప్రజల నుంచి వసూలు చేసే పన్నులు, ప్రభుత్వ ఆదాయాన్ని ఏ విధంగా ఖర్చు చేస్తున్నారనే అంశంపై న్యాయస్థానం దృష్టి సారించింది.
భూ బాధితుల సమస్యలపైనా ఆరా
భూసేకరణ సమయంలో బాధితులకు తగిన న్యాయం జరగకపోవడంతో వారు ఏళ్ల తరబడి కోర్టుల చుట్టూ తిరుగుతున్న పరిస్థితిపై కూడా హైకోర్టు స్పందించింది. భూ బాధితుల సమస్యల పరిష్కారానికి ప్రభుత్వం తీసుకుంటున్న చర్యలేమిటో గురువారం తమకు వివరించాలని రాష్ట్ర ప్రభుత్వాన్ని ఆదేశించింది.
ఈ అంశంపై ప్రభుత్వం సమర్పించే వివరాలను పరిశీలించిన అనంతరం తదుపరి చర్యలపై నిర్ణయం తీసుకోనుంది. దీంతో భూసేకరణ బాధితులకు సంబంధించిన అంశం కూడా విచారణలో కీలకంగా మారింది.
స్టే ఎత్తివేయాలని ప్రభుత్వ విజ్ఞప్తి
ఇదిలా ఉండగా, కల్యాణలక్ష్మీ, షాదీ ముబారక్ పథకాలపై ప్రస్తుతం ఉన్న స్టేను ఎత్తివేయాలని తెలంగాణ ప్రభుత్వం తరఫు న్యాయవాదులు హైకోర్టును కోరారు. ఈ పథకాలపై స్టే కొనసాగితే ఇప్పటికే అర్హత సాధించిన లబ్ధిదారులు ఇబ్బందులు ఎదుర్కొనే అవకాశం ఉందని ప్రభుత్వం తరఫున వాదించారు. లబ్ధిదారుల ప్రయోజనాలను దృష్టిలో ఉంచుకుని స్టేను తొలగించాలని విజ్ఞప్తి చేశారు.
ప్రభుత్వం చేసిన ఈ అభ్యర్థనపై హైకోర్టు గురువారం నిర్ణయం తీసుకునే అవకాశం ఉంది. అదే సమయంలో భూ బాధితుల సమస్యలపై ప్రభుత్వం సమర్పించే నివేదికపైనా విచారణ జరగనుంది. దీంతో గురువారం జరిగే విచారణపై ఆసక్తి నెలకొంది.
