నాపై నమోదయ్యే ప్రతి ఎఫ్‌ఐఆర్‌ ఒక పతకంతో సమానం.
* కేసులకు భయపడేది లేదు.. అవి వందకు చేరినా వెనక్కి తగ్గే ప్రసక్తే లేదు.
* ఢిల్లీలో విపక్షాల మహా నిరసన.. రోడ్డుపై బైఠాయించిన రాహుల్, ప్రియాంక, ఇండియా కూటమి ఎంపీలు.
న్యూఢిల్లీ, మహా .
పౌరుల ప్రజాస్వామ్య హక్కుల పరిరక్షణ కోసం సాగించే పోరాటంలో తనపై నమోదయ్యే ప్రతి కేసును ఒక గౌరవ పతకంగానే భావిస్తానని లోక్‌సభ ప్రతిపక్ష నేత రాహుల్ గాంధీ స్పష్టం చేశారు. ఇప్పటికే తనపై 45 ఎఫ్‌ఐఆర్‌లు నమోదయ్యాయని, ప్రజల తరఫున గళమెత్తినందుకు అవి వందకు చేరినా సంతోషంగా స్వీకరిస్తానే తప్ప కేంద్ర ప్రభుత్వ బెదిరింపులకు, తప్పుడు కేసులకు ఏమాత్రం భయపడే ప్రసక్తే లేదని తేల్చిచెప్పారు. కేంద్ర ఎన్నికల సంఘం ఏకపక్ష వైఖరి, ఓటర్ల జాబితాల ప్రత్యేక సమగ్ర సవరణ (ఎస్ఐఆర్) ప్రక్రియను నిరసిస్తూ బుధవారం దేశ రాజధాని ఢిల్లీలో ‘ఇండియా’ కూటమి తలపెట్టిన ఆందోళన తీవ్ర ఉద్రిక్తతకు దారితీసింది.
ఓటర్ల జాబితాల సవరణ పేరిట లక్షలాది మంది ఓట్లను అకారణంగా తొలగించారంటూ ఎన్నికల ప్రధాన కమిషనర్ (సీఈసీ) జ్ఞానేశ్ కుమార్ రాజీనామాను డిమాండ్ చేస్తూ విపక్షాలు జంతర్ మంతర్ వద్ద భారీ నిరసనకు పిలుపునిచ్చాయి. ఈ క్రమంలో కాంగ్రెస్ అగ్రనేతలు రాహుల్ గాంధీ, ప్రియాంక గాంధీ వాద్రా సహా ఇండియా కూటమికి చెందిన సుమారు 300 మంది లోక్‌సభ, రాజ్యసభ ఎంపీలు 10-జన్‌పథ్ నుంచి ప్రత్యేక బస్సుల్లో ర్యాలీగా బయలుదేరారు. అయితే, మంగళవారం పార్లమెంట్ నుంచి ఎన్నికల సంఘం ప్రధాన కార్యాలయానికి ఎంపీలు చేపట్టిన మార్చ్‌ తీవ్ర ఉద్రిక్తతకు దారితీయడంతో అప్రమత్తమైన ఢిల్లీ పోలీసులు, ఈసారి జన్‌పథ్ సమీపంలోనే భారీగా బారికేడ్లు ఏర్పాటు చేసి బస్సులను అడ్డగించారు. ఎంపీలను ముందుకు వెళ్లకుండా నిర్బంధించడంతో ఆగ్రహం వ్యక్తం చేసిన రాహుల్, ప్రియాంక గాంధీలతో పాటు విపక్ష ఎంపీలంతా బస్సుల నుంచి దిగి నడిరోడ్డుపైనే బైఠాయించి కేంద్ర సర్కారుకు వ్యతిరేకంగా హోరెత్తేలా నినాదాలు చేశారు.
రోడ్డుపై బైఠాయించిన అనంతరం రాహుల్ గాంధీ మీడియాతో మాట్లాడుతూ కేంద్ర ప్రభుత్వం, ఎన్నికల కమిషన్‌పై తీవ్రస్థాయిలో ధ్వజమెత్తారు. నిన్నటి నిరసనల నేపథ్యంలో తనపై నమోదు చేసిన తాజా కేసును ప్రస్తావిస్తూ, ప్రజాస్వామ్య పరిరక్షణ కోసం గళమెత్తిన ప్రతిసారీ పాలకులు కేసులు బనాయిస్తున్నారని విమర్శించారు. తనపై ఇప్పటివరకు 45 ఎఫ్‌ఐఆర్‌లు నమోదయ్యాయని, ప్రజల హక్కుల కోసం అలుపెరగని పోరాటం సాగిస్తున్నందుకు ఆ సంఖ్య 100కు చేరినా వెనుకాడబోనని స్పష్టం చేశారు. దేశవ్యాప్తంగా దాదాపు 300 మంది ఎంపీలు మంగళవారం స్వయంగా వెళ్లి ప్రధాన ఎన్నికల కమిషనర్‌ను కలిసి ప్రజల అభ్యంతరాలను విన్నవించుకోవాలని భావిస్తే, కనీసం అపాయింట్‌మెంట్ కూడా ఇవ్వకుండా తిరస్కరించడం రాజ్యాంగ విరుద్ధమని ఆగ్రహం వ్యక్తం చేశారు.
ఈసీ పక్షపాత వైఖరిని, కేంద్ర ప్రభుత్వ ఒత్తిళ్లకు తలొగ్గుతున్న తీరును దేశ ప్రజల ముందు ఎండగట్టడానికే తాము జంతర్ మంతర్ వద్ద నిరసనకు పిలుపునిచ్చినట్లు రాహుల్ వెల్లడించారు. పారదర్శకంగా వ్యవహరించాల్సిన రాజ్యాంగబద్ధమైన ఎన్నికల సంఘం అధికార పార్టీకి తొత్తుగా మారిందని ఆరోపించారు. జ్ఞానేశ్ కుమార్ చట్టబద్ధమైన సీఈసీగా వ్యవహరించడం లేదని, రాజ్యాంగ స్ఫూర్తిని తుంగలో తొక్కేలా వ్యవహరిస్తున్నారని మండిపడ్డారు. దేశ పౌరుల ప్రాథమిక హక్కు అయిన ఓటు హక్కును కొల్లగొట్టే కుట్రలను సహించేది లేదని హెచ్చరిస్తూ, ప్రజాస్వామ్యాన్ని అపహాస్యం చేస్తున్న సీఈసీ జ్ఞానేశ్ కుమార్ వెంటనే తన పదవికి రాజీనామా చేయాలని రాహుల్ గాంధీ డిమాండ్ చేశారు.
