- ప్రైవేటు భూములను ప్రభుత్వ భూములుగా చూపించే ప్రసక్తే లేదు.
- అధికారుల పొరపాట్లతోనే సమస్య.
- అర్హమైన భూములను నిషేధిత జాబితా నుంచి తొలగిస్తాం.
- రాష్ట్ర రెవెన్యూ శాఖ మంత్రి పొంగులేటి శ్రీనివాస రెడ్డి.
హైదరాబాద్‌, మహా.
రాష్ట్రంలో ప్రైవేటు భూములను 22ఏ నిషేధిత జాబితాలో చేర్చిన వ్యవహారంపై ప్రభుత్వం కీలక స్పష్టత ఇచ్చింది. ప్రజల ఆస్తులకు ఎలాంటి ఇబ్బంది కలిగించాలన్న ఉద్దేశం ప్రభుత్వానికి లేదని రాష్ట్ర రెవెన్యూ శాఖ మంత్రి పొంగులేటి శ్రీనివాస్‌రెడ్డి స్పష్టం చేశారు. నిజమైన భూ యజమానులు ఎలాంటి ఆందోళనకు గురికావాల్సిన అవసరం లేదని భరోసా ఇచ్చారు.
22ఏ నిషేధిత జాబితా నుంచి తమ భూములను తొలగించాలని కోరుతూ రాష్ట్రవ్యాప్తంగా 757 దరఖాస్తులు అందినట్లు మంత్రి వెల్లడించారు. వీటిలో అత్యధికంగా మేడ్చల్‌ జిల్లా నుంచి 511 దరఖాస్తులు వచ్చినట్లు తెలిపారు. మేడ్చల్‌ జిల్లాలో వచ్చిన దరఖాస్తుల్లో 320 పట్టణ భూ గరిష్ఠ పరిమితి అంశానికి సంబంధించినవేనని వివరించారు.
మెజార్టీ దరఖాస్తులు నిజమైనవే
22ఏ జాబితా నుంచి భూములను తొలగించాలని వచ్చిన దరఖాస్తులను అధికారులు పరిశీలించారని మంత్రి తెలిపారు. ఈ పరిశీలనలో మెజార్టీ దరఖాస్తులు నిజమైనవేనని తేలిందన్నారు. గతంలోనూ కొన్ని భూములు నిషేధిత జాబితాలో ఉన్నట్లు గుర్తించామని, ప్రస్తుతం సమస్య తలెత్తడానికి అధికారుల పొరపాట్లు కూడా ఒక కారణమని వెల్లడించారు.
ప్రైవేటు భూములను ప్రభుత్వ భూములుగా చూపించడం తమ ప్రభుత్వ ఉద్దేశం కాదని పొంగులేటి స్పష్టం చేశారు. ప్రజల ఆస్తి హక్కులకు భంగం కలగకుండా సమస్యను పరిష్కరించేందుకు ప్రభుత్వం చర్యలు తీసుకుంటోందన్నారు.
ఉన్నతస్థాయి కమిటీతో పరిశీలన
22ఏ జాబితాపై వచ్చిన ఫిర్యాదులను పరిశీలించేందుకు ఉన్నతస్థాయి కమిటీని ఏర్పాటు చేసినట్లు మంత్రి తెలిపారు. అర్హత ఉన్న, నిబంధనల ప్రకారం ప్రైవేటు వ్యక్తులకు చెందిన భూములను నిషేధిత జాబితా నుంచి తొలగించే ప్రక్రియను చేపడుతున్నట్లు వెల్లడించారు.
భూముల విషయంలో తలెత్తిన సాంకేతిక, పరిపాలనా లోపాలను సరిదిద్దడంతో పాటు నిజమైన భూ యజమానులకు న్యాయం జరిగేలా చర్యలు తీసుకుంటామని మంత్రి హామీ ఇచ్చారు. 22ఏ జాబితాలో పేరు ఉందన్న కారణంతో నిజమైన భూ యజమానులు భయపడాల్సిన అవసరం లేదని, అర్హతను నిర్ధారించిన తర్వాత తగిన నిర్ణయం తీసుకుంటామని స్పష్టం చేశారు.
