ఎన్నికల కమిషనర్ల నియామక చట్టంపై సుప్రీంకోర్టులో కీలక పరిణామం…

ఎన్నికల కమిషనర్ల నియామక చట్టంపై సుప్రీంకోర్టులో కీలక పరిణామం.
*’భిన్న తీర్పుల పరిశీలనకు అంగీకరించిన ప్రధాన న్యాయమూర్తి.
* తగిన ధర్మాసనం ఏర్పాటుపై హామీ.
న్యూఢిల్లీ, మహా:
ప్రధాన ఎన్నికల కమిషనర్ (సీఈసీ), ఇతర ఎన్నికల కమిషనర్ల (ఈసీ) నియామకాల కోసం కేంద్ర ప్రభుత్వం 2023లో తీసుకువచ్చిన నూతన చట్టంపై సుప్రీంకోర్టులో కీలక పరిణామం చోటుచేసుకుంది. ఈ చట్టం రాజ్యాంగబద్ధతను సవాలు చేస్తూ దాఖలైన వ్యాజ్యాలను ఎంతమంది సభ్యులతో కూడిన ధర్మాసనం విచారించాలనే అంశంపై గత నెల (సెప్టెంబర్) 23న వెలువడిన భిన్న తీర్పులను పరిశీలించేందుకు అత్యున్నత న్యాయస్థానం బుధవారం అంగీకరించింది. ఈ మేరకు తగిన ధర్మాసనాన్ని ఏర్పాటు చేసే అంశాన్ని పరిశీలిస్తామని భారత ప్రధాన న్యాయమూర్తి (సీజేఐ) జస్టిస్ సూర్యకాంత్ స్పష్టం చేశారు.
సీఈసీ, ఈసీల నియామక ప్రక్రియలో మార్పులు చేస్తూ పార్లమెంటు ఆమోదించిన 2023 చట్టంపై దాఖలైన పిటిషన్లను ఐదుగురు న్యాయమూర్తులతో కూడిన రాజ్యాంగ ధర్మాసనానికి బదిలీ చేయాలా వద్దా అన్న అంశంపై జస్టిస్ దీపాంకర్ దత్తా, జస్టిస్ సతీశ్ చంద్ర శర్మలతో కూడిన ధర్మాసనం గత నెలలో విచారణ జరిపింది. అయితే, దీనిపై ఈ ఇద్దరు న్యాయమూర్తులు ఏకాభిప్రాయానికి రాలేకపోయారు. ఈ వివాదాన్ని కేవలం ఇద్దరు న్యాయమూర్తుల ధర్మాసనం మాత్రమే విచారించవచ్చని, రాజ్యాంగ ధర్మాసనానికి బదిలీ చేయాల్సిన అవసరం లేదని జస్టిస్ దీపాంకర్ దత్తా అభిప్రాయపడ్డారు. ఇందుకు విరుద్ధంగా, ఎన్నికల సంఘం నియామకాల వంటి అత్యంత కీలకమైన, రాజ్యాంగపరమైన ప్రాముఖ్యత ఉన్న అంశాన్ని ఐదుగురు న్యాయమూర్తులతో కూడిన విస్తృత ధర్మాసనమే విచారించాలని జస్టిస్ సతీశ్ చంద్ర శర్మ తమ తీర్పులో స్పష్టం చేశారు.
న్యాయమూర్తులిద్దరూ భిన్న తీర్పులు వెలువరించిన నేపథ్యంలో, పిటిషనర్ల తరఫు న్యాయవాదులు ఈ అంశాన్ని తదుపరి చర్యల కోసం ప్రధాన న్యాయమూర్తి వద్ద ప్రస్తావించారు. బుధవారం సీజేఐ జస్టిస్ సూర్యకాంత్ నేతృత్వంలోని ధర్మాసనం దృష్టికి ఈ వ్యవహారాన్ని తీసుకువెళ్లి, భిన్న తీర్పుల నేపథ్యంలో విచారణకు ఒక స్పష్టమైన ధర్మాసనాన్ని ఏర్పాటు చేయాలని కోరారు. పిటిషనర్ల విజ్ఞప్తిపై సానుకూలంగా స్పందించిన సీజేఐ.. ఈ వ్యాజ్యాలను క్షుణ్ణంగా పరిశీలిస్తామని, రాజ్యాంగబద్ధమైన ఈ అంశంపై విచారణ కొనసాగించేందుకు సరైన నిర్ణయం తీసుకుంటామని వెల్లడించారు. దీంతో ఈ అత్యంత కీలకమైన కేసును విచారించేందుకు సుప్రీంకోర్టు ఎటువంటి ధర్మాసనాన్ని ఏర్పాటు చేస్తుందనే దానిపై న్యాయ, రాజకీయ వర్గాల్లో సర్వత్రా ఆసక్తి నెలకొంది.