గణేశ్ ఉత్సవాల్లో నిర్లక్ష్యం వద్దు.
* పకడ్బందీ భద్రతా చర్యలు చేపట్టాలి.
*ప్రతి వినాయక మండపానికి జియో ట్యాగింగ్.
* నిమజ్జన మార్గాలపై ప్రత్యేక నిఘా.
* సోషల్ మీడియాపై నిరంతర పర్యవేక్షణ.
* డీజేలకు అనుమతి లేదు.
* ఆంధ్రప్రదేశ్ హోంమంత్రి వంగలపూడి అనిత.
అమరావతి, మహా:
గణేశ్ ఉత్సవాలు ప్రశాంత వాతావరణంలో ఎలాంటి అవాంఛనీయ ఘటనలకు తావులేకుండా నిర్వహించేందుకు కట్టుదిట్టమైన భద్రతా చర్యలు చేపట్టాలని ఆంధ్రప్రదేశ్ హోంమంత్రి వంగలపూడి అనిత జిల్లా ఎస్పీలను ఆదేశించారు. శనివారం సచివాలయం నుంచి జిల్లా పోలీసు ఉన్నతాధికారులతో నిర్వహించిన టెలికాన్ఫరెన్స్లో గణేశ్ ఉత్సవాల ఏర్పాట్లు, నిమజ్జన కార్యక్రమాలు, ట్రాఫిక్ నియంత్రణ, విద్యుత్ భద్రత, సోషల్ మీడియా పర్యవేక్షణ తదితర అంశాలపై ఆమె సమీక్షించారు. ఉత్సవాల నిర్వహణలో ఏ స్థాయిలోనూ నిర్లక్ష్యానికి తావివ్వరాదని స్పష్టం చేశారు.
రాష్ట్రవ్యాప్తంగా ఏర్పాటు చేసే ప్రతి వినాయక మండపానికి సంబంధించిన పూర్తి వివరాలను ఆన్లైన్ పోర్టల్లో తప్పనిసరిగా నమోదు చేయించాలని హోంమంత్రి ఆదేశించారు. మండప నిర్వాహకుల వివరాలతో పాటు నిమజ్జనానికి ఉపయోగించే వాహనాల సమాచారాన్ని కూడా ముందుగానే నమోదు చేయాలని సూచించారు. మండపాల పర్యవేక్షణకు స్టేషన్ హౌస్ ఆఫీసర్లకు ప్రత్యేక లాగిన్ సదుపాయం కల్పించాలని ఆదేశించారు.
కమిషనర్లు, డీసీపీలు, ఎస్పీలు కేవలం కార్యాలయాలకే పరిమితం కాకుండా క్షేత్రస్థాయిలో మండపాలను స్వయంగా తనిఖీ చేయాలని అనిత స్పష్టం చేశారు. తనిఖీ చేసిన వివరాలను సంబంధిత పాయింట్ బుక్లో నమోదు చేయాలని ఆదేశించారు. మండపాల వద్ద భద్రతా ఏర్పాట్లు, విద్యుత్ కనెక్షన్లు, రాకపోకలు, అత్యవసర పరిస్థితుల్లో తీసుకోవాల్సిన చర్యలను ముందుగానే పరిశీలించాలని సూచించారు.
గణేశ్ నిమజ్జన కార్యక్రమాల సందర్భంగా విద్యుత్ భద్రత, ట్రాఫిక్ నిర్వహణపై ప్రత్యేక దృష్టి సారించాలని హోంమంత్రి ఆదేశించారు. విద్యుత్, అగ్నిమాపక శాఖల అధికారులతో పోలీసు అధికారులు సమన్వయం చేసుకుని ముందస్తు చర్యలు చేపట్టాలని సూచించారు. మండపాల వద్ద విద్యుత్ తీగలు, తాత్కాలిక కనెక్షన్లు, జనరేటర్లు తదితర అంశాలను పరిశీలించి ప్రమాదాలకు అవకాశం లేకుండా చూడాలని ఆదేశించారు.
నిమజ్జన మార్గాలపై ముందుగానే సమగ్ర తనిఖీలు నిర్వహించాలని అనిత సూచించారు. విగ్రహాలు తరలించే మార్గాల్లో రోడ్లు, వంతెనల పరిస్థితిని పరిశీలించడంతో పాటు వాటి లోడ్ బేరింగ్ సామర్థ్యాన్ని ముందుగానే నిర్ధారించాలని అధికారులను ఆదేశించారు. నిమజ్జనం రోజున భారీ సంఖ్యలో ప్రజలు, వాహనాలు తరలివచ్చే అవకాశం ఉన్నందున ట్రాఫిక్ నిర్వహణకు ప్రత్యేక ప్రణాళిక సిద్ధం చేయాలని చెప్పారు.
నిమజ్జన ప్రాంతాల్లో సీసీ కెమెరాలను ఏర్పాటు చేసి నిరంతరం పర్యవేక్షించాలని హోంమంత్రి ఆదేశించారు. భక్తుల రద్దీని నియంత్రించేందుకు క్యూ మేనేజ్మెంట్ వ్యవస్థను ఏర్పాటు చేయాలని, అవసరమైన సంఖ్యలో వాలంటీర్ల సేవలను వినియోగించుకోవాలని సూచించారు. సున్నిత ప్రాంతాల్లో బాంబ్ డిటెక్షన్ అండ్ డిస్పోజల్ బృందాలు, డాగ్ స్క్వాడ్లను అందుబాటులో ఉంచాలని ఆదేశించారు.
శబ్ద కాలుష్య నియంత్రణ విషయంలో నిబంధనలను కచ్చితంగా అమలు చేయాలని అనిత స్పష్టం చేశారు. రాత్రి 10 గంటల తర్వాత లౌడ్స్పీకర్ల వినియోగాన్ని నిలిపివేయాలని, డీజేలకు ఎట్టి పరిస్థితుల్లోనూ అనుమతి ఇవ్వకూడదని ఆదేశించారు. గణేశ్ ఉత్సవాల పేరుతో మద్యం వినియోగం, అశ్లీల ప్రదర్శనలు, ఇతర అసాంఘిక కార్యకలాపాలకు తావులేకుండా కఠిన చర్యలు తీసుకోవాలని పోలీసు అధికారులకు సూచించారు.
సోషల్ మీడియాపై ప్రత్యేక నిఘా పెట్టాలని హోంమంత్రి ఆదేశించారు. ఉత్సవాల సమయంలో ప్రజలను రెచ్చగొట్టే పోస్టులు, వివాదాస్పద నినాదాలు, అభ్యంతరకరమైన ఫ్లెక్సీలు, వదంతులు వ్యాప్తి చేసే ప్రయత్నాలపై నిరంతరం పర్యవేక్షణ ఉండాలని చెప్పారు. శాంతిభద్రతలకు విఘాతం కలిగించే అవకాశం ఉన్న సమాచారాన్ని ముందుగానే గుర్తించి తగిన చర్యలు తీసుకోవాలని సూచించారు.
రౌడీషీటర్లు, ట్రబుల్ మాంగర్లు, గతంలో వివాదాలకు కారణమైన వ్యక్తులపై ముందస్తుగా నిఘా పెట్టాలని అనిత ఆదేశించారు. అవసరమైన చోట వారిని పిలిపించి కౌన్సెలింగ్ నిర్వహించాలని, ఉత్సవాల సందర్భంగా ఎలాంటి అవాంఛనీయ కార్యకలాపాలకు పాల్పడకుండా ముందస్తు చర్యలు తీసుకోవాలని సూచించారు. శాంతిభద్రతలకు విఘాతం కలిగించే ఘటనలు చోటుచేసుకుంటే సంబంధిత మండపాల నిర్వాహకుల బాధ్యతను కూడా పరిగణనలోకి తీసుకుంటామని హెచ్చరించారు.
గణేశ్ ఉత్సవ కమిటీలు, శాంతి కమిటీలతో పోలీసులు నిరంతరం సమావేశాలు నిర్వహించాలని హోంమంత్రి సూచించారు. స్థానికంగా ఉన్న సమస్యలను ముందుగానే గుర్తించి పరిష్కరించుకోవడం ద్వారా ఉత్సవాలను ప్రశాంతంగా నిర్వహించవచ్చని పేర్కొన్నారు. నిర్వాహకులు, ప్రజలు పోలీసు శాఖకు సహకరించాలని, అనుమానాస్పద వ్యక్తులు లేదా వస్తువులు కనిపించినా, ఏదైనా అవాంఛనీయ పరిస్థితి తలెత్తినా వెంటనే డయల్ 112కు సమాచారం అందించాలని అనిత పిలుపునిచ్చారు.
గణేశ్ ఉత్సవాలు భక్తిశ్రద్ధలతో, సామరస్యపూర్వక వాతావరణంలో జరిగేలా పోలీసు యంత్రాంగం సమగ్ర ప్రణాళికతో ముందుకు సాగాలని హోంమంత్రి స్పష్టం చేశారు. ప్రజల భద్రతే అత్యున్నత ప్రాధాన్యమని, ఉత్సవాల సందర్భంగా చిన్నపాటి నిర్లక్ష్యం కూడా పెద్ద సమస్యకు దారితీయకుండా అధికారులు అప్రమత్తంగా వ్యవహరించాలని ఆమె ఆదేశించారు.
