•సైబర్‌ నేరాల్లో రిటైర్డ్ ఉద్యోగులే ఎక్కువ.
•40 రకాల సైబర్‌ నేరాలను గుర్తించాం.
•పెట్టుబడుల పేరుతో మోసాలే అధికం: డీజీపీ సీవీ ఆనంద్.
హైదరాబాద్‌, మహా.
కాలానుగుణంగా నేరాల స్వరూపం మారుతోందని తెలంగాణ డీజీపీ సీవీ ఆనంద్ అన్నారు. గతంలో భౌతిక దోపిడీలు ఎక్కువగా జరిగేవని, ప్రస్తుతం నార్కోటిక్‌, సైబర్‌ నేరాలు ఆందోళనకరంగా పెరుగుతున్నాయని తెలిపారు. సైబర్‌ నేరాల బారినపడుతున్న వారిలో రిటైర్డ్ ఉద్యోగులు, సీనియర్‌ సిటిజన్లు అధికంగా ఉంటున్నారని పేర్కొన్నారు. తెలంగాణ సైబర్‌ సెక్యూరిటీ బ్యూరో ఆధ్వర్యంలో శుక్రవారం నిర్వహించిన ‘సురక్ష కా తిరంగా’ సైబర్‌ అవేర్‌నెస్‌ కార్యక్రమంలో డీజీపీ పాల్గొని మాట్లాడారు.
రిటైర్డ్ ఉద్యోగులు, సీనియర్‌ సిటిజన్లను కూడా సైబర్‌ నేరాలపై అవగాహన కార్యక్రమాల్లో భాగస్వామ్యం చేస్తున్నామని డీజీపీ తెలిపారు. డిజిటల్‌ లావాదేవీలు, ఆన్‌లైన్‌ పెట్టుబడులు, ఫోన్‌ కాల్స్‌, సందేశాల ద్వారా జరుగుతున్న మోసాలపై అప్రమత్తంగా ఉండాల్సిన అవసరం ఉందన్నారు. సైబర్‌ నేరగాళ్లు కొత్త కొత్త పద్ధతులను అనుసరిస్తున్న నేపథ్యంలో ప్రజలు కూడా తమ అప్రమత్తతను ఎప్పటికప్పుడు పెంచుకోవాలని సూచించారు.
కొన్నేళ్ల క్రితం వరకు భౌతిక దోపిడీలు, ఇతర సాంప్రదాయ నేరాలు ఎక్కువగా ఉండేవని, ప్రస్తుతం నేరగాళ్లు సాంకేతికతను వినియోగించుకుంటూ సైబర్‌ నేరాలకు పాల్పడుతున్నారని సీవీ ఆనంద్ వివరించారు. మరోవైపు నార్కోటిక్‌ నేరాలు కూడా పెరుగుతున్నాయని తెలిపారు. మాదకద్రవ్యాల బారినపడుతున్న విద్యార్థులు, యువత తమ భవిష్యత్తును నాశనం చేసుకుంటున్నారని ఆందోళన వ్యక్తం చేశారు. మాదకద్రవ్యాల దుష్ప్రభావాలపై యువతలో మరింత అవగాహన కల్పించాల్సిన అవసరం ఉందన్నారు.
సైబర్‌ మోసాలకు గురైన అనేక మంది ఫిర్యాదు చేసేందుకు కూడా వెనకాడుతున్నారని డీజీపీ తెలిపారు. తమకు జరిగిన మోసం బయటకు తెలిస్తే ఇతరులు ఏమనుకుంటారోననే భయంతో బాధితులు విషయాన్ని దాచిపెడుతున్నారని పేర్కొన్నారు. ముఖ్యంగా వృద్ధులు, రిటైర్డ్ ఉద్యోగులు ఈ విషయంలో ఇబ్బందులు ఎదుర్కొంటున్నారని చెప్పారు. సైబర్‌ మోసానికి గురైన వెంటనే పోలీసులకు సమాచారం అందించి ఫిర్యాదు చేయాలని సూచించారు.
తెలంగాణలో ఇప్పటివరకు 40 రకాల సైబర్‌ నేరాలను గుర్తించినట్లు సీవీ ఆనంద్ వెల్లడించారు. వీటిలో పెట్టుబడుల పేరుతో జరిగే మోసాలు ఎక్కువగా ఉన్నాయని తెలిపారు. అధిక లాభాలు వస్తాయని నమ్మించి బాధితుల నుంచి భారీ మొత్తంలో డబ్బులు కాజేస్తున్నారని పేర్కొన్నారు. సోషల్‌ మీడియా, ఫోన్‌ కాల్స్‌, మెసేజింగ్‌ యాప్‌లను ఉపయోగించుకుని సైబర్‌ నేరగాళ్లు ప్రజలను ఆకర్షిస్తున్నారని చెప్పారు.
పోలీసులు సైబర్‌ నేరాలను అడ్డుకునేందుకు నిరంతరం చర్యలు చేపడుతున్నప్పటికీ నేరగాళ్లు కూడా తమ పద్ధతులను ఎప్పటికప్పుడు మార్చుకుంటున్నారని డీజీపీ తెలిపారు. పోలీసులు ఒక మోసపూరిత విధానాన్ని గుర్తించి అడ్డుకునేలోపే నేరగాళ్లు మరో కొత్త విధానాన్ని తెరపైకి తీసుకొస్తున్నారని వివరించారు. అందువల్ల సైబర్‌ భద్రత అనేది ఒక్కసారి నేర్చుకునే అంశం కాదని, నిరంతరం అప్రమత్తంగా ఉండాల్సిన అవసరం ఉందన్నారు.
‘సురక్ష కా తిరంగా’ కార్యక్రమం ద్వారా స్వాతంత్య్ర దినోత్సవాన్ని పురస్కరించుకుని ప్రజలకు సైబర్‌ భద్రతపై అవగాహన కల్పిస్తున్నామని డీజీపీ తెలిపారు. ముఖ్యంగా సీనియర్‌ సిటిజన్లు, రిటైర్డ్ ఉద్యోగులు ఆన్‌లైన్‌ మోసాల విషయంలో అప్రమత్తంగా ఉండేలా కార్యక్రమాలు నిర్వహిస్తున్నామని చెప్పారు. సాంకేతిక పరిజ్ఞానం పెరుగుతున్న కొద్దీ సైబర్‌ నేరాల రూపాలు కూడా మారుతున్నందున ప్రతి ఒక్కరూ జాగ్రత్తగా వ్యవహరించాలని సీవీ ఆనంద్ సూచించారు.
