- జోర్డాన్లోని అమ్మాన్లో జరిగిన AKF 24వ జూనియర్ & U21 ఛాంపియన్షిప్లో కాంస్య పతకం
హైదరాబాద్: జోర్డాన్ రాజధాని అమ్మాన్లో నిర్వహించిన AKF 24వ జూనియర్ & U21 ఛాంపియన్షిప్–2026లో తెలంగాణకు చెందిన కరాటే క్రీడాకారిణి బ్రహ్మదండి సత్యతేజ అద్భుత ప్రతిభ కనబరిచి కాంస్య పతకం సాధించారు. **66 కేజీల విభాగం వ్యక్తిగత కుమిటే (Individual Kumite)**లో సత్యతేజ ఈ ఘనత సాధించారు.
అంతర్జాతీయ వేదికపై తెలంగాణకు ప్రాతినిధ్యం వహించి పతకం సాధించిన సత్యతేజను హైదరాబాద్లోని ఎమ్మెల్యే క్వార్టర్స్లో తెలంగాణ స్పోర్ట్స్ కరాటే డూ అసోసియేషన్ అధ్యక్షులు, టీపీసీసీ చీఫ్, ఎమ్మెల్సీ మహేష్ కుమార్ గౌడ్ ఘనంగా సన్మానించి అభినందించారు.
ఈ సందర్భంగా మహేష్ కుమార్ గౌడ్ మాట్లాడుతూ, సీఎం రేవంత్ రెడ్డి నేతృత్వంలోని రాష్ట్ర ప్రభుత్వం క్రీడలకు అత్యధిక ప్రాధాన్యం ఇస్తోందని తెలిపారు. తెలంగాణలో క్రీడాకారులకు మెరుగైన అవకాశాలు కల్పిస్తూ, జాతీయ, అంతర్జాతీయ స్థాయిలో రాణించేలా ప్రోత్సహిస్తున్నామని పేర్కొన్నారు.
“తెలంగాణలో కరాటే క్రీడ వేగంగా దూసుకెళ్తుందనడానికి సత్యతేజ సాధించిన అంతర్జాతీయ పతకమే నిదర్శనం” అని మహేష్ కుమార్ గౌడ్ అన్నారు. సత్యతేజ భవిష్యత్తులో మరిన్ని అంతర్జాతీయ విజయాలు సాధించి తెలంగాణతో పాటు దేశానికి పేరు తీసుకురావాలని ఆకాంక్షించారు.
AKF 24వ జూనియర్ & U21 ఛాంపియన్షిప్లో తెలంగాణ నుంచి పతకం సాధించిన తొలి మహిళా క్రీడాకారిణిగా సత్యతేజ రికార్డు సృష్టించారు. అంతర్జాతీయ స్థాయిలో ఆమె కనబరిచిన ప్రతిభ తెలంగాణ కరాటే రంగానికి గర్వకారణంగా నిలిచింది.
*సత్యతేజ సాధించిన విజయంపై ఆమె వ్యక్తిగత కోచ్, ఇండియా కోచ్ కీర్తన్ కొండూరు, స్టేట్ జనరల్ సెక్రటరీ రామస్వామి, ఆమె తల్లిదండ్రులు బ్రహ్మదండి రమేష్, స్వర్ణలత* తదితరులు హర్షం వ్యక్తం చేసి అభినందనలు తెలిపారు.
