సుప్రీంలో పెద్దిరెడ్డికి చుక్కెదురు.
• బుగ్గమఠం భూముల వ్యవహారంలో ఏపీ హైకోర్టు తీర్పు సమర్థన.
అమరావతి, మహా.
వైసీపీ సీనియర్ నేత, మాజీ మంత్రి పెద్దిరెడ్డి రామచంద్రారెడ్డికి న్యాయస్థానంలో భారీ ఎదురుదెబ్బ తగిలింది. తిరుపతిలోని బుగ్గమఠం భూముల ఆక్రమణ, అక్రమ నిర్మాణాల వ్యవహారంలో ఆయన దాఖలు చేసిన పిటిషన్‌పై విచారణకు అత్యున్నత న్యాయస్థానం సోమవారం స్పష్టంగా నిరాకరించింది. ఈ భూ వివాదానికి సంబంధించి ఆంధ్రప్రదేశ్ హైకోర్టు గతంలో వెలువరించిన తీర్పును సుప్రీంకోర్టు పూర్తిగా సమర్థించింది. హైకోర్టు ఆదేశాల ప్రకారం ఈ వ్యవహారంలో దేవాదాయ, ధర్మాదాయ ట్రైబ్యునల్‌ను ఆశ్రయించాల్సిందేనని జస్టిస్ విశ్వనాథన్, జస్టిస్ అరుణ్‌లతో కూడిన ధర్మాసనం పెద్దిరెడ్డికి తేల్చిచెప్పింది.
తిరుపతి జిల్లా ఎమ్మార్‌పల్లి పరిధిలో ఉన్న బుగ్గమఠానికి చెందిన విలువైన భూములను పెద్దిరెడ్డి రామచంద్రారెడ్డి ఆక్రమించి, అందులో అక్రమంగా నిర్మాణాలు చేపట్టారనే ఆరోపణలు ఉన్నాయి. ఈ నేపథ్యంలో ఆక్రమిత స్థలంలో చేపట్టిన నిర్మాణాలను పది రోజుల్లోగా పూర్తిగా ఖాళీ చేయాలంటూ బుగ్గమఠం కార్యనిర్వహణాధికారి (ఈవో) గత మే నెలలో అధికారికంగా నోటీసులు జారీ చేశారు. ఈవో ఇచ్చిన ఈ ఉత్తర్వులను సవాల్ చేస్తూ పెద్దిరెడ్డి తొలుత ఆంధ్రప్రదేశ్ హైకోర్టును ఆశ్రయించారు. పిటిషన్‌ను విచారించిన సింగిల్ బెంచ్.. ఈవో ఉత్తర్వులపై ఎలాంటి అభ్యంతరాలున్నా నాలుగు వారాల్లోగా దేవాదాయ, ధర్మాదాయ ట్రైబ్యునల్‌లోనే అప్పీలు చేసుకోవాలని స్పష్టం చేస్తూ తీర్పునిచ్చింది.
సింగిల్ బెంచ్ తీర్పును సవాల్ చేస్తూ పెద్దిరెడ్డి రామచంద్రారెడ్డి హైకోర్టు డివిజన్ బెంచ్‌ను ఆశ్రయించగా.. అక్కడ కూడా ఆయనకు ఊరట దక్కలేదు. దేవాదాయ ట్రైబ్యునల్‌కు వెళ్లేందుకు సింగిల్ బెంచ్ విధించిన నాలుగు వారాల గడువును మరో నాలుగు వారాలకు పొడిగిస్తూ డివిజన్ బెంచ్ తీర్పునిచ్చింది. హైకోర్టు ఇచ్చిన ఈ తీర్పును సవాల్ చేస్తూ ఆయన సుప్రీంకోర్టులో పిటిషన్ దాఖలు చేశారు. తాజాగా ఈ పిటిషన్‌ను విచారించిన అత్యున్నత న్యాయస్థానం.. ఏపీ హైకోర్టు తీర్పులో తాము జోక్యం చేసుకోబోమని స్పష్టం చేయడంతో పెద్దిరెడ్డికి తీవ్ర నిరాశే మిగిలింది. సుప్రీంకోర్టు తాజా ఆదేశాలతో బుగ్గమఠం భూముల వ్యవహారంలో మాజీ మంత్రి పెద్దిరెడ్డి ఇక తప్పనిసరి పరిస్థితుల్లో దేవాదాయ, ధర్మాదాయ ట్రైబ్యునల్‌లోనే తన వాదనలు వినిపించాల్సి ఉంటుంది.
