ఉచిత పథకాలపై హైకోర్టు కీలక వ్యాఖ్యలు..! ప్రభుత్వ ఖజానాపై ఆర్థిక భారం పెరుగుతోంది..

• ప్రభుత్వ ఖజానాపై ఆర్థిక భారం పెరుగుతోంది.
• పన్నుల ఆదాయాన్ని ఉచితాలకు వినియోగించడం సరికాదు

హైదరాబాద్‌, మహా.

సంక్షేమ పథకాల పేరుతో ఉచిత ప్రయోజనాలు అందించడం వల్ల ప్రభుత్వ ఖజానాపై పడుతున్న ఆర్థిక భారంపై తెలంగాణ హైకోర్టు ఆందోళన వ్యక్తం చేసింది. పింఛన్లు, ఇతర ప్రయోజనాల చెల్లింపులు జరగడం లేదంటూ పదవీ విరమణ పొందిన ప్రభుత్వ ఉద్యోగులు సైతం న్యాయస్థానాలను ఆశ్రయిస్తున్నారని పేర్కొంది. ప్రభుత్వ ఆర్థిక విధానాల్లో న్యాయస్థానాలు నేరుగా జోక్యం చేసుకోలేవని స్పష్టం చేసినప్పటికీ.. పన్నుల రూపంలో సమకూరే ఆదాయాన్ని ఉచిత పథకాలకు మళ్లించడం సరైన విధానం కాదని వ్యాఖ్యానించింది.

కల్యాణలక్ష్మి, షాదీముబారక్‌ పథకాల చట్టబద్ధతను సవాల్‌ చేస్తూ న్యాయవాది విజయ్‌ గోపాల్‌ దాఖలు చేసిన పిటిషన్‌పై గురువారం హైకోర్టులో మరోసారి విచారణ జరిగింది. జస్టిస్‌ ఎన్‌.వి. శ్రవణ్‌కుమార్‌ ఈ పిటిషన్‌ను విచారించారు.

అప్పులు చేసి సంక్షేమ పథకాలు అమలు చేస్తారా?

ప్రభుత్వం అప్పులు చేసి సంక్షేమ పథకాలను కొనసాగించాలని భావిస్తోందా? అని ధర్మాసనం ప్రశ్నించింది. వివిధ చెల్లింపులకు నిధుల కొరత ఉందని గతంలో కోర్టుకు హాజరైన అధికారులు పేర్కొన్న విషయాన్ని గుర్తు చేసింది.

ప్రభుత్వ రంగ సంస్థలను సమర్థంగా నిర్వహించి వాటిని లాభదాయకంగా మార్చగలిగితే, ఆ ఆదాయాన్ని సంక్షేమ కార్యక్రమాలకు వినియోగించే అవకాశం ఉంటుందని న్యాయస్థానం సూచించింది. తాము ఏ రాజకీయ పార్టీని, ప్రభుత్వ విధానాన్ని విమర్శించడం లేదని స్పష్టం చేసింది. 2014 నుంచి కల్యాణలక్ష్మి పథకంపై చేసిన వ్యయం, ఆర్థిక ప్రభావానికి సంబంధించిన వివరాలను మాత్రమే కోరుతున్నామని పేర్కొంది.

బాల్య వివాహాల నిర్మూలన కోసమే..

కల్యాణలక్ష్మి, షాదీముబారక్‌ పథకాలను బాల్య వివాహాలను అరికట్టే లక్ష్యంతో అమలు చేస్తున్నామని ప్రభుత్వ తరఫు అదనపు న్యాయవాది మహమ్మద్‌ ఇమ్రాన్‌ఖాన్‌ ధర్మాసనానికి వివరించారు. ఈ పథకాలకు బడ్జెట్‌లో ప్రత్యేకంగా నిధులు కేటాయిస్తున్నామని తెలిపారు.

ఇతర రాష్ట్రాల్లోనూ ఇదే తరహా సంక్షేమ పథకాలు అమలవుతున్నాయని పేర్కొన్నారు. బడ్జెట్‌ కేటాయింపులకు శాసనసభ ఆమోదం ఉంటుందని, ఈ అంశాన్ని కూడా పరిగణనలోకి తీసుకోవాలని కోరారు.

సమగ్ర వివరాలతో అఫిడవిట్‌ దాఖలు చేయాలి

ప్రభుత్వం దాఖలు చేసిన అఫిడవిట్‌లో పూర్తి వివరాలు లేవని హైకోర్టు తప్పుపట్టింది. అందులో రాజ్యాంగంలోని 162వ అధికరణను ఎందుకు ప్రస్తావించారని ప్రశ్నించింది. సంబంధం లేని అధికరణను పొరపాటున అఫిడవిట్‌లో చేర్చినట్లు ప్రభుత్వ తరఫు న్యాయవాది అంగీకరించారు.

దీంతో తప్పులను సరిదిద్ది, పథకాల అమలుకు సంబంధించిన చట్టపరమైన ప్రాతిపదిక, ఆర్థిక వివరాలు, నిధుల కేటాయింపులు, ఇప్పటివరకు చేసిన వ్యయం తదితర అంశాలను సమగ్రంగా పొందుపరుస్తూ కొత్త కౌంటర్‌ అఫిడవిట్‌ దాఖలు చేయాలని ధర్మాసనం ఆదేశించింది. ఆ తర్వాతే తదుపరి వాదనలు వింటామని స్పష్టం చేసింది.

2014 నుంచి వ్యయ వివరాలు ఇవ్వాలి

కల్యాణలక్ష్మి, షాదీముబారక్‌ పథకాలకు సంబంధించి 2014 నుంచి జారీ చేసిన ఎనిమిది ప్రభుత్వ ఉత్తర్వులను సవాల్‌ చేస్తూ న్యాయవాది విజయ్‌ గోపాల్‌ వ్యక్తిగత హోదాలో పిటిషన్‌ దాఖలు చేశారు. చట్టపరమైన అనుమతి లేకుండా ప్రభుత్వ సమీకృత నిధి నుంచి డబ్బులు ఖర్చు చేయడం సరికాదని ఆయన తరఫు న్యాయవాది వాదించారు.

పథకాల అమలుకు కేవలం ప్రభుత్వ ఉత్తర్వులు, ఆర్థిక శాఖ అనుమతులు సరిపోతాయా? వాటికి చట్టపరమైన ఆధారం ఏమిటి? అని ధర్మాసనం ప్రశ్నించింది. దీనిపై ప్రభుత్వం సమగ్ర వివరణ ఇవ్వాలని ఆదేశించింది.

పూర్తి వాదనల తర్వాతే నిర్ణయం

కల్యాణలక్ష్మి, షాదీముబారక్‌ పథకాలపై ఉన్న మధ్యంతర నిలుపుదల ఉత్తర్వులను ఎత్తివేయాలని ప్రభుత్వం తరఫు న్యాయవాది కోరారు. అయితే పూర్తి వాదనలు విన్న తర్వాతే దీనిపై నిర్ణయం తీసుకుంటామని హైకోర్టు స్పష్టం చేసింది. తదుపరి విచారణను సోమవారానికి వాయిదా వేసింది.
ఉచిత పథకాల అమలు, ప్రభుత్వ ఆర్థిక స్థితి, ప్రజాధనం వినియోగం, సంక్షేమ పథకాలకు చట్టపరమైన ఆధారం వంటి అంశాలపై హైకోర్టు చేసిన తాజా వ్యాఖ్యలు రాష్ట్ర ఆర్థిక విధానాలపై మరోసారి విస్తృత చర్చకు దారితీశాయి.