• కొత్త రైళ్లు.. అదనపు నిలుపుదలలు.
• రైల్వే ప్రాజెక్టులను గడువులోగా పూర్తి చేయాలి.
• ఎంపీల డిమాండ్
సికింద్రాబాద్, మహా.
దక్షిణ మధ్య రైల్వే పరిధిలో అమృత్ భారత్ రైల్వే స్టేషన్ల అభివృద్ధి పనులు ఆశించిన స్థాయిలో ముందుకు సాగడం లేదని పార్లమెంట్ సభ్యులు అసంతృప్తి వ్యక్తం చేశారు. ప్రయాణికుల అవసరాలకు అనుగుణంగా పనులను వేగవంతం చేసి, నిర్ణీత గడువులోగా పూర్తిచేయాలని దక్షిణ మధ్య రైల్వే ఉన్నతాధికారులను కోరారు. కొత్త రైళ్లను ప్రవేశపెట్టడంతో పాటు ప్రస్తుతం నడుస్తున్న రైళ్లకు అదనపు నిలుపుదలలు కల్పించాలని, అవసరమైన మార్గాల్లో రైళ్లను పొడిగించాలని విజ్ఞప్తి చేశారు.
తెలంగాణ, ఆంధ్రప్రదేశ్, కర్ణాటక రాష్ట్రాలకు చెందిన దక్షిణ మధ్య రైల్వే పరిధి పార్లమెంట్ సభ్యులతో సికింద్రాబాద్లోని రైల్ నిలయంలో సమన్వయ సమావేశం జరిగింది. కేంద్ర బొగ్గు, గనుల శాఖ మంత్రి జి.కిషన్రెడ్డితో పాటు 15 మంది పార్లమెంట్ సభ్యులు సమావేశంలో పాల్గొన్నారు. రైల్వే ప్రాజెక్టుల పురోగతి, ప్రయాణికుల సౌకర్యాలు, కొత్త రైలు మార్గాలు, రహదారి పైవంతెనలు, కింది వంతెనలు తదితర అంశాలపై విస్తృతంగా చర్చించారు.
కొత్త రైళ్లు.. అదనపు నిలుపుదలలు
ప్రాంతాల వారీగా ప్రయాణికుల డిమాండ్ను పరిగణనలోకి తీసుకుని కొత్త రైళ్లను అందుబాటులోకి తీసుకురావాలని ఎంపీలు కోరారు. ఇప్పటికే నడుస్తున్న రైళ్లకు అవసరమైన ప్రాంతాల్లో అదనపు నిలుపుదలలు కల్పించాలని, మరికొన్ని రైళ్లను పొడిగించాలని సూచించారు. ప్రయాణికులకు మెరుగైన మౌలిక సదుపాయాలు, పరిశుభ్రత, సౌకర్యాలు కల్పించడంపై ప్రత్యేక దృష్టి పెట్టాలని కోరారు.
కొత్త రైల్వే మార్గాల నిర్మాణం, మార్గాల విస్తరణ, రహదారి పైవంతెనలు, కింది వంతెనల నిర్మాణ పనుల్లో చోటుచేసుకున్న జాప్యాన్ని తొలగించాలని ఎంపీలు కోరారు. ముఖ్యంగా కొవిడ్ అనంతరం నిలిచిపోయిన పనులను తిరిగి వేగవంతం చేయాలని సూచించారు.
కాజీపేటలో రైల్వే డివిజన్కు డిమాండ్
కాజీపేటలో ప్రత్యేక రైల్వే డివిజన్ ఏర్పాటు చేయాలని అన్ని పార్టీల ఎంపీలు కలిసి కోరినట్లు బీజేపీ ఎంపీ ఈటల రాజేందర్ తెలిపారు. తెలంగాణలో రైల్వే మౌలిక సదుపాయాలను మరింత విస్తరించాల్సిన అవసరం ఉందన్నారు.
మహబూబ్నగర్ ప్రాంతంలో కొత్త రైల్వే మార్గాల నిర్మాణానికి సంబంధించిన అంశాలను రైల్వే ఉన్నతాధికారుల దృష్టికి తీసుకెళ్లినట్లు బీజేపీ ఎంపీ డీకే అరుణ తెలిపారు. రాష్ట్రంలో ప్రతిపాదిత వేగవంతమైన రైలు మార్గాలపై వస్తున్న ప్రచారాన్ని కేంద్ర రైల్వే మంత్రిత్వ శాఖ దృష్టికి తీసుకెళ్లినట్లు ఎంపీ రఘునందన్రావు చెప్పారు.
ఈదుల నాగులపల్లి ప్రాంతంలో టెర్మినల్, రైల్వే అనుసంధానం, కొత్త రైలు మార్గాలను అభివృద్ధి చేయాలని కూడా ఆయన కోరారు.
భద్రాచలానికి నేరుగా రైలు మార్గం
భద్రాచలానికి ఇప్పటికీ సరైన రైల్వే అనుసంధానం లేకపోవడంపై ఎంపీ వద్దిరాజు రవిచంద్ర ఆందోళన వ్యక్తం చేశారు. వందేళ్ల చరిత్ర ఉన్న భద్రాచలానికి కొత్తగూడెం మార్గంలో ఏర్పాటు చేసిన రైల్వే స్టేషన్ పూర్తిస్థాయిలో ప్రయోజనం చేకూర్చడం లేదన్నారు. పాండురంగాపురం నుంచి భద్రాచలానికి రైల్వే అనుసంధానం కల్పించాలని, గాజులమడుగు నుంచి నేరుగా రైలు మార్గాన్ని ఏర్పాటు చేయాలని కోరారు.
భద్రాచలంలో రైల్వే స్టేషన్ ఏర్పాటు చేస్తే ఐదు రాష్ట్రాలకు రవాణా అనుసంధానం మరింత మెరుగుపడుతుందని ఆయన పేర్కొన్నారు. ఈ ప్రాంతంలోని ఆదివాసీలు, వెనుకబడిన ప్రాంతాల ప్రజలకు కూడా రైల్వే మార్గం ఎంతో ప్రయోజనం చేకూరుస్తుందని తెలిపారు.
రూ.24,210 కోట్లతో పనులు
దక్షిణ మధ్య రైల్వే పరిధిలో రూ.24,210.179 కోట్ల అంచనా వ్యయంతో మొత్తం 1,481 కిలోమీటర్ల మేర కొత్త రైల్వే మార్గాలు, మార్గాల రెట్టింపు, మూడింతలు చేసే పనులు ప్రస్తుతం పురోగతిలో ఉన్నాయని రైల్వే జీఎం సంజయ్కుమార్ శ్రీవాస్తవ తెలిపారు.
స్టేషన్ల అభివృద్ధి, రైళ్లలో పరిశుభ్రత, ప్రయాణికుల సౌకర్యాల మెరుగుదల తదితర అంశాలపై ఎంపీలకు ఆయన వివరించారు. సమావేశంలో ఎంపీలు ప్రస్తావించిన సమస్యలను పరిశీలించి వాటి పరిష్కారానికి చర్యలు తీసుకుంటామని హామీ ఇచ్చారు. రైల్వే మౌలిక వసతుల విస్తరణతో పాటు పెరుగుతున్న ప్రయాణికుల అవసరాలకు అనుగుణంగా రైళ్ల సంఖ్య, నిలుపుదలలు, అనుసంధాన మార్గాలను పెంచడమే లక్ష్యంగా ముందుకు సాగాలని ఎంపీలు స్పష్టం చేశారు.
