- ఏడాదిలోపే లబ్ధిదారులకు తాళాలు.
- నిర్ణీత గడువు కంటే ముందుగా నిర్మిస్తే కాంట్రాక్టర్లకు ప్రత్యేక ప్రోత్సాహకాలు.
- మంత్రి పొంగులేటి శ్రీనివాస్‌రెడ్డి
హైదరాబాద్, మహా.
పేదల సొంతింటి కలను వాస్తవరూపంలోకి తీసుకురావాలన్న ప్రభుత్వ లక్ష్యానికి అనుగుణంగా ఇందిరమ్మ ఇళ్ల నిర్మాణాన్ని అత్యంత వేగంగా చేపడుతున్నట్లు రాష్ట్ర రెవెన్యూ, గృహనిర్మాణ శాఖల మంత్రి పొంగులేటి శ్రీనివాస్‌రెడ్డి స్పష్టం చేశారు. ఈరోజు (మంగళవారం) కుత్బుల్లాపూర్ నియోజకవర్గం పరిధిలోని గాజులరామారంలో ప్రతిష్ఠాత్మక ‘ఇందిరమ్మ టవర్స్’ నిర్మాణ పనులకు ఆయన లాంఛనంగా శంకుస్థాపన చేశారు. అనంతరం లబ్ధిదారులకు ఇంటి కేటాయింపు పత్రాలను ఆయన స్వయంగా అందజేశారు. ఈ సందర్భంగా మంత్రి మాట్లాడుతూ, పేదవాడి ఆత్మగౌరవానికి ప్రతీకగా నిలిచే ఈ ఇందిరమ్మ ఇళ్ల టవర్స్ నిర్మాణాన్ని సరిగ్గా ఏడాదిలోపు పూర్తి చేసి, లబ్ధిదారులకు వారి చేతుల మీదుగానే తాళాలు అందజేస్తామని హామీ ఇచ్చారు. గ్రేటర్ హైదరాబాద్ పరిధిలోని అర్హులైన పేదలకు ఎట్టి పరిస్థితుల్లోనూ అత్యుత్తమ నాణ్యతా ప్రమాణాలతో కూడిన ఇళ్లను అందిస్తామని ఉద్ఘాటించారు.
ఇళ్ల నిర్మాణ పనుల్లో వేగాన్ని పెంచేందుకు ప్రభుత్వం వినూత్న అడుగులు వేస్తోందని మంత్రి పొంగులేటి వెల్లడించారు. ప్రభుత్వం నిర్దేశించిన గడువు కంటే ముందుగా ఇందిరమ్మ టవర్స్ పనులను పూర్తి చేసే కాంట్రాక్టర్లకు ప్రత్యేక నగదు ప్రోత్సాహకాలు అందజేస్తామని ఆయన కీలక ప్రకటన చేశారు. కాంట్రాక్టు గడువు కంటే ఒక నెల ముందుగా పనులు పూర్తి చేస్తే రూ.45 లక్షలు, అదే రెండు నెలల ముందుగా పూర్తి చేస్తే ఏకంగా రూ.90 లక్షల మేర అదనపు ప్రోత్సాహక బహుమతిని అందిస్తామని పేర్కొన్నారు. అయితే పనుల వేగం పేరుతో నాణ్యతలో ఏమాత్రం రాజీ పడే ప్రసక్తే లేదని, ఇళ్ల నిర్మాణం పూర్తయ్యే వరకు లబ్ధిదారులు సైతం ఎప్పటికప్పుడు ఆ పనులను దగ్గరుండి పరిశీలిస్తూ ఉండాలని అధికారులకు, ప్రజలకు ఆయన దిశానిర్దేశం చేశారు. గ్రేటర్ పరిధిలోని మొత్తం 23 అసెంబ్లీ నియోజకవర్గాల్లో ఇందిరమ్మ టవర్స్ నిర్మాణం ఒక నిరంతర ప్రక్రియగా కొనసాగుతుందని ఆయన స్పష్టం చేశారు.
ఇళ్ల కేటాయింపులో ఎలాంటి రాజకీయ జోక్యానికి, పైరవీలకు తావులేకుండా అత్యంత పారదర్శకంగా ఆన్‌లైన్‌ విధానాన్ని అవలంబించామని మంత్రి పొంగులేటి శ్రీనివాస్‌రెడ్డి వివరించారు. కుత్బుల్లాపూర్ పరిధిలోని గాజులరామారంలో ఇందిరమ్మ ఇళ్ల కోసం ఏకంగా 7 వేల మందికి పైగా ఆన్‌లైన్‌లో దరఖాస్తు చేసుకున్నారని, క్షేత్రస్థాయి విచారణ అనంతరం అందులో 5,218 మందిని అర్హులుగా గుర్తించామని తెలిపారు. వీరి నుంచి బహిరంగంగా నిర్వహించిన లక్కీ డ్రా ద్వారా ప్రస్తుతానికి 480 మంది లబ్ధిదారులను ఎంపిక చేసినట్లు ఆయన వెల్లడించారు. కుత్బుల్లాపూర్ నియోజకవర్గంలో మొత్తం మూడు విడతల్లో అర్హులైన వారందరికీ ఇళ్లు మంజూరు చేస్తామని, ప్రస్తుతం ఇక్కడ 7.5 ఎకరాల స్థలం అందుబాటులో ఉందని ఆయన పేర్కొన్నారు. నగరంలో ఇళ్ల నిర్మాణానికి అవసరమైన ఇతర ప్రభుత్వ భూములతో పాటు, హౌసింగ్ బోర్డు పరిధిలోని స్థలాలను గుర్తించి రాబోయే రోజుల్లో పెద్ద ఎత్తున ఈ ప్రాజెక్టును విస్తరిస్తామని మంత్రి తెలిపారు.
